Azərbaycan, Bakı, 27 noyabr/ Trend , müxbir Ü.İsmayılova/ Bakıda fiziki baxımdan hələ 30 ilə dayana biləcək "Xruşşov" və "Stalin" layihəli tikililəri sökmək hələ tezdir, - "MBA Group" Konsaltinq Şirkətinin Baş direktoru Nüsrət İbrahimov hesab edir.
"Əlbəttə, zaman ötdükcə mənzil fondunu yeniləmək lazımdır və "Xruşşov" və "Stalin" layihəli tikililər mənəvi baxımdan köhnəlsə də, fiziki baxımdan hələ köhnəlməyiblər", - ekspert cümə axşamı bildirib.
Onun sözlərinə görə, bu binaların orta istismar müddəti 50 ildir. Lakin konstruksiya və istifadə edilən materiallardan asılı olaraq, 25 ildən 120 ilədək dəyişə bilər.
Buna baxmayaraq, onun rəyinə görə, Bakıda belə evləri sökmək hələ tezdir. Hazırda Bakının mərkəzindəki köhnə evləri sökmək lazımdır.
Azərbaycanın Daşınmaz Əmlakın Dövlət Reyestri Xidmətinin rəhbəri Arif Qaraşov çərşənbə günü bildirib ki, Bakının mənzil fondunun yenilənməsi çərçivəsində, "Xruşşov" və "Stalin" layihəli tikililərin sakinləri köçürüləcək və yeni müasir mənzillərdə yerləşdiriləcəklər.
Bakıda "Xruşşov" və "Stalin" layihəli tikililərin əksəriyyəti şəhərin 1,2,3,4, 5 - ci mikrorayonlarında tikilib.
Müəlliflə əlaqə saxlamaq üçün elektron ünvan: [email protected]
