Azərbaycan, Bakı, 03 dekabr/ Trend , müxbir E.İsmayılov/ İlini sonunadək Ələt-Astara (İran sərhədi) avtomobil yolunun 22 km-lik hissəsinin tikintisinin başa çatdırılması planlaşdırılır. Bu barədə çərşənbə günü Azərbaycanın Nəqliyyat Nazirliyindəki mənbə bildirib.
"Hazırda bu məntəqədə gücləndirilmiş iş aparılır, çünki yolun bu il istifadəyə verilməsi planlaşdırılıb", - deyə mənbə bildirib.
Nəqliyyat nazirinin müavini Musa Pənahov əvvəllər bildirib ki, 2009-cu ilin əvvəlindən Ələt-Astara avtomobil yolunun qalan hissəsinin tikintisinə başlanılacaq.
Layihə 195 km uzunluğunda olan Ələt-Asrata yolunun yeni hissəsinin tikintisini nəzərdə tutur. Bu rəqəmin 30 km-i mövcud yolda yerləşəcək. Qalan 165 km isə Bakı-Astra avtomobil yolundan başqa, yeni yol qismində tikiləcək. Bu, məsafəni qısaltmağa imkan verəcək. Hazırda Bakı-Astara yolunun uzunluğu 313 km təşkil edir. Yeni yolun tikilməsindən sonra bu məsafə 265 km təşkil edəcək. Onun təqribi eni 27-30 metrdir, yol dördzolaqlı olacaq. Tikintini Akkord şirkəti həyata keçirəcək. Bakı-İran sərhədi layihəsinin tam reallaşdırılmasının 2012-cü ilədək başa çatdırılması planlaşdırılır.
Ələt-Masallı yolunun tikintisi Dünya Bankı tərəfindən ayrılan kredit hesabına həyata keçiriləcək. Azərbaycana magistral avtomobil yollarının müasirləşdirilməsi və yenidənqurulması üçün 300 mln. dollarlıq vəsait 10 illik güzəştli dövr ilə 40 il müddətinə verilib.
Kredit Şərq-Qərb və Şimal-Cənub marşrutları üzrə avtomobil yollarının yenidənqurma işləri zamanı istifadə olunacaq.
Əlavə vəsait Azərbaycanı Rusiya və İran ilə birləşdirən Ələt-Masallı (İran istiqaməti) və Tağıyev-Sahil (Rusiya istiqaməti) məntəqələrindəki yolların, həmçinin yerli əhəmiyyətli 200 km-lik yolun müasirləşdirilməsinə ayrılacaq.
Masallı-Astara yolunun tikintisi Asiya İnkişaf Bankının ayırdığı 200 mln. dollar həcmində kredit hesabına həyata keçiriləcək. Bu məbləğ 500 mln. dollarlıq ümumi kreditin ilk tranşıdır. Masallı-Astara avtomobil yolu üçün kredit Multitranche Financing Facility (MFF) mexanizmi çərçivəsində təqdim olunub və üç yol layihəsinin maliyyələşdirilməsi üçün nəzərdə tutulub. Bu günədək hələ ki, bir layihə razılaşdırılıb, bank MFF-nın qalan vəsaitlərinin istifadəsi üçün 2014-cü ilədək vaxt verib.
Dekabrın 3-nə olan rəsmi məzənnə 0,8091 AZN/USD təşkil edir.
Məqalə müəllifi ilə əlaqə ünvanı - [email protected]
