Azərbaycan, Bakı, 10 dekabr/ Trend , müxbir Ü.İsmayılova/ Yüz faizlik Latviya kapitalına malik Azərbaycanın iri lizinq şirkətlərindən biri Parex Leasing & Factoring MMC yeni layihələrin maliyyələşdirilməsini dayandırıb. Buna səbəb dünya maliyyə böhranının şirkətin təsisçisi - Latviyanın Parex Bank-na təsiridir. Bu barədə çərşənbə günü şirkətdən bildiriblər.
"Hazırda şirkət fəaliyyətini davam etdirir və köhnə layihələr üzərində işləyir;Parex Bank-dan törəmə strukturun fəaliyyətinin dayandırılması barədə qərar daxil olmayıb", - deyə şirkətdən bildiriblər.
Noyabrda Latviya hökuməti növbədənkənar iclasda bankı müflisləşmədən xilas etmək üçün Parex Bank-ın kapitalında nəzarət səhm paketinin əldə edilməsi barədə qərar qəbul edib. Hökumət tərəfindən əldə olunan 51 faizlik iştirak payı paketi dövlətə məxsus Latvijas Hipoteku un zemes banka-a verilib. Lakin dekabrın 3-də Latviya hökumətinin təcili iclasında Parex Bank-ın səhmlərinin 84,83 faizinin dövlətin nəzarətinə götürülməsi barədə qərar qəbul olunub. Dövlət bankın sindikatlaşdırılmış kreditlərinə zəmanət vermək öhdəliyini üzərinə götürüb.
Parex bank Latviyanın iri bankıdır. 2008 - ci il aprelin sonuna olan məlumatlara görə, o, respublikada cəlb edilən əmanətlərin (19,8 faizlik bazar payı ilə) həcminə görə birinci, aktivlərin (14,4 faizlik bazar payı ilə) böyüklüyünə görə ikinci yeri tutub.
Parex Leasing and Factoring 2005-ci ilin martından fəaliyyət göstərir. Parex Bank-ın lizinq şirkətləri Moskva, Sankt-Peterburq, Kiyev, Minsk, Tallin və Vilnüsdə də fəaliyyət göstərir. Parex Leasing & Factoring-ın Nizamnamə kapitalı 50 min dollardır. Şirkətin lizinq portfeli avqustun əvvəli üçün 46,9 mln. dollar təşkil edib.
Məqalə müəllifi ilə əlaqə ünvanı - [email protected]