Azərbaycan, Bakı, 16 yanvar/ Trend , müxbirlər S.Babayeva, E.İsmayılov/
Ukrayna zərurət yarandıqca Azərbaycana taxıl ixracının həcmini artıra bilər, - Ukraynanın Azərbaycandakı səfiri Boris Klimçuk cümə günü bildirib.
Onun sözlərinə görə, 2009 - cu il yanvarın 1-nə olan vəziyyətə görə, Ukraynadan Azərbaycana 100 min tondan çox taxıl gətirilib.
"Əlbəttə, bu bizim həyata keçirmək istədiyimiz həcm deyil", - Klimçuk deyib.
Azərbaycanın Kənd Təsərrüfatı Nazirliyinin məlumatlarına əsasən, 2008 - ci ildə respublikaya Rusiya, Qazaxıstan və Ukraynadan 1,1 mln. tondan çox taxıl gətirilib.
2008 - ci ildə Azərbaycanda dənli və dənli - paxlalı bitkilər istehsalı hökumətin proqnozlaşdırdığı kimi rekord səviyyəyə çatıb . Dövlət Statistika Komitəsinin məlumatına görə, ötən il dənli bitkilərin (qarğıdalı da daxil olmaqla) istehsalı 2,5 mln. tona çatıb ki, bu da 2007 - ci illə müqayisədə 492 min ton çoxdur.
İstehsalın ümumi həcmindən 1,7 mln. ton (68,7 faiz) payızlıq və yazlıq buğdanın payına düşüb.
Azərbaycanın taxıla olan illik tələbatı üç milyon təşkil edir. Bunun 1 mln. tonu idxal olunur. Kənd Təsərrüfatı Nazirliyi yaxın illərdə ölkənin ərzaq taxılına olan daxili tələbatını yerli istehsal hesabına tam ödəməyi proqnozlaşdırır.
Müəlliflə əlaqə saxlamaq üçün elektron ünvan: [email protected]