Azərbaycan, Bakı, 11 mart / Trend , müxbir Ü.İsmayılova /
"Azərbaycandakı daşınmaz əmlak, eləcə də ipoteka bazarının inkişafı peşəkar qiymətvericilər olmadan mümkün deyil", - çərşənbə günü Bakıda, Azərbaycanda yaşayış əmlakına qiymətvericilərin sertifikatlaşdırılması üzrə birinci imtahanda iştirak edən, Rusiya Qiymətvericilər Cəmiyyətinin (RQC) birinci vitse-prezidenti İqor Artemenkov deyib.
"Dünya təcrübəsi göstərdi ki, peşəkar qiymətvericilərin mövcudluğu sayəsində, qiymətvermə sistemi inkişaf etmiş ölkələr dünya maliyyə böhranının minimal təsirinə məruz qalanlar sırasında yer alıb. Çünki onlar riskləri qiymətləndirmək bacarığına malik idilər", - Artemenkov qeyd edib.
Onun sözlərinə görə, qiymətverənlər bazar iqtisadiyyatı üçün vacib elementdirlər və bu mütəxəssislər Azərbaycan iqtisadiyyatının inkişafında böyük rol oynayacaqlar.
Qiymətqoyma fəaliyyəti ölkə iqtisadiyyatının vacib istiqamətlərindən biridir. O, bazarda baş verən dəyişikliklərə fəal təsir edir.
Artemenkovun sözlərinə görə, Azərbaycanda qiymətqoyma fəaliyyəti təxminən 15 ildir inkişaf edir, amma qiymətqoyanlara vahid tələblər mövcud deyil. Ölkədə daşınmaz əmlak bazarının inkişafı üçün qiymətqoyma üzrə mütəxəssislərin ixtisasına vahid tələblərin tətbiqi vacibdir.
Azərbaycan qiymətvericilərinin sertifikatlaşdırılması ilk dəfə keçirilir. Pilot imtahan Beynəlxalq Maliyyə Korporasiyasının (BMK) Azərbaycan Qiymətvericilər Cəmiyyəti və Beynəlxalq Qiymət Mərkəzi ilə birgə Azərbaycan və Mərkəzi Asiyada ilkin ipoteka bazarının inkişaf etdirilməsi proqramı çərçivəsində keçirilir.
İmtahanın birinci mərhələsinə 16 namizəddən 9 qiymətverici buraxılacaq. Qiymətvericilərdən imtahanı İqor Artemenkov, həmçinin RQC-nin ixtisas komissiyasının sədr müavini Həmid Mamacanov götürəcək. İmtahanlar iki mərhələdə - birincisi yazılı, ikincisi şifahi - keçiriləcək. Bundan sonra isə sertifikasiyanı bugünkü imtahanı keçmiş qiymətverənlər Azərbaycan Qiymətvericilər Cəmiyyəti çərçivəsində aparacaqlar.
Azərbaycanda qiymətqoyma fəaliyyəti 1995-ci ildə qəbul edilmiş "Qiymətvermə fəaliyyəti haqqında" qanunla tənzimlənir. Hazırda qiymətvericilər cəmiyyəti qanuna əlavə və dəyişikliklər hazırlayır.
Məqalə müəllifi ilə əlaqə ünvanı: [email protected]
