Azərbaycan, Bakı, 28 aprel / Trend , müxbir D.İbrahimova /
Kubanın hökumət üzvlərindən ibarət nümayəndə heyətinin mayın ortalarında Bakıya səfəri zamanı Azərbaycan-Kuba iqtisadi münasibətlərinin perspektivləri müzakirə olunacaq.
Kubanın xarici ticarət və xarici investisiyalar naziri müavinin rəhbərlik edəcəyi nümayəndə heyətinin səfəri çərçivəsində 16-20 may tarixlərində Bakıda ticari-iqtisadi əməkdaşlıq üzrə hökumətlərarası komissiyanın ikinci iclası keçiriləcək. Bu barədə çərşənbə axşamı Trend -a Kubanın Azərbaycandakı səfiri Marselo Kabalero Torres bildirib.
Torres bildirib ki, Kuba tərəfi komissiyanın həmsədrinə, Azərbaycanın mədəniyyət və turizm naziri Əbülfəs Qarayevə öz təkliflərini artıq təqdim edib.
İmzalanması planlaşdırılan təqribən 10 saziş layihəsi var. Hökumətlərarası komissiyanın ikinci iclası çərçivəsində mədəniyyət, ticarət, idman, energetika və ekologiya sahələrində sazişlərin imzalanması planlaşdırılır.
Komissiyanın ilk iclası 2007-ci ilin noyabrında Kubada baş tutub.
"Kuba Azərbaycandan qida məhsulları, neft sənayesi üçün avadanlıq almaqda maraqlıdır. Kuba məhsulları, xüsusilə də, siqar, rom, şəkər və biotexnoloji məhsulların Azərbaycan sahibkarları üçün maraq kəsb edəcəyini düşünürəm. Kubada biotexnoloji məhsullar, biopereparatlar, tibbi xidmətlər inkişaf edib və düşünürəm ki, bu da Azərbaycanı maraqlandıra bilər. Ola bilsin ki, gələcəkdə biz tibb və Kuba idmanı sahələrində mütəxəssis mübadiləsi apara biləcəyik", - deyə səfir əlavə edib.
Məqalə müəllifi ilə əlaqə ünvanı: [email protected]
