Azərbaycan, Bakı, 16 may / Trend /
Azərbaycan Dövlət Statistika Komitəsinin məlumatına görə, yanvar-apreldə ölkənin nəqliyyat sektoru ilə müxtəlif tipli 57,2 mln. ton yük daşınıb ki, bu da ötən ilin analoji dövr göstəricisi ilə müqayisədə 1,8 faiz çoxdur.
Daşınan yüklərin ümumi həcminin 71,4 faizi özəl sektorun payına düşür. Yanvar-aprel ərzində daşınan yüklərin ümumi həcminin 46,2 faizi avtomobil nəqliyyatı, 35,3 faizi boru kəmərləri, 11,4 faizi dəmiryol və 7,1 faizi dəniz nəqliyyatının payına düşüb.
Yanvar-apreldə sərnişin nəqliyyatı ilə 413,2 mln. nəfər daşınıb ki, bu da 2008-ci ilin analoji dövr göstəricisi ilə müqayisədə 7,7 faiz çoxdur. Sərnişindaşımada 81,7 faiz özəl sektorun payına düşür. Sərnişinlərin əsas hissəsi avtomobil nəqliyyatı (81,8 faiz) və metro (17,7 faiz) ilə daşınıb.
Dəmiryol nəqliyyatı ilə ötən ilin yanvar-aprel ayında qeydə alınan 8,9 mln. tona nisbətdə müxtəlif tipli 6,5 mln. ton yük daşınıb.
Dəniz nəqliyyatı ilə müxtəlif tipli 4,1 mln. ton yük daşınıb. Bu, ötən ilin yanvar-aprel aylarının göstəriciləri ilə müqayisədə 11,7 faiz çoxdur. Daşınan yüklərin ümumi həcminin 71,4 faizi neft və neft məhsulları, qalan hissəsi - 28,6 faizi isə quru yüklərin payına düşüb.
Daşınan yüklərin bütün həcmi beynəlxalq əməliyyatların payına düşüb.
Yanvar-apreldə Azərbaycan limanlarında aşırılmış yüklərlərin həcmi ötən ilin analoji dövründə qeydə alınan 1,9 mln. tona nisbətdə 1,7 mln. ton təşkil edib.
Avtomobil nəqliyyatı ilə 26,4 mln. ton yük daşınıb ki, bu da 2008-ci ilin yanvar-aprel göstəricisi ilə müqayisədə 8,2 faiz çoxdur. Sərnişindaşıma həcmi 337,9 milyon nəfər təşkil edib (7,6 faiz artıb). Sərnişinlərin 96,7 faizi avtobus, 3,3 faizi isə minik avtomobilləri ilə daşınıb.
Metropoliten tərəfindən sərnişindaşıma həcmi 73 mln.təşkil edib və 8,4 faiz artıb.
Cari ilin birinci rübündə hava nəqliyyatı ilə 354 min sərnişin daşınıb. Bu göstərici ötən ilin analoji dövründə 374,5 min nəfərə bərabər olub. Nəqliyyatın bu növündə daşınmaların 7,5 faizi özəl sektorun payına düşüb.
2009-cu ilin yanvar-aprelində magistral neft kəmərləri ilə 15,8 mln. ton neft nəql olunub. Bu göstərici 2008-ci ilin analoji dövründə 15,6 mln. ton təşkil edib. Nəqlin 74,4 faizi Bakı-Tbilisi-Ceyhan boru kəmərinin payına düşüb. Yanvar-apreldə Bakıdan bu neft kəməri ilə 11,8 mln. ton neft yüklənib. Bu göstərici ötən ilin analoji dövründə 11,7 mln. ton təşkil edib.
Cari ilin yanvar-aprelində magistral qaz kəmərləri ilə 6,2 mlrd. kubmetr qaz nəql olunub. Bu göstərici 2008-ci ilin analoji dövr göstəricisindən 27,3 faiz çoxdur. Nəql olunan qazın 2,1 mlrd. kubmetri Cənubi Qafqaz boru kəmərinin payına düşüb.
2009-cu ilin yanvar-aprelində Azərbaycandan Avrasiya nəqliyyat dəhlizi ilə ötən ilin analoji dövründə qeydə alınan 11,6 mln. tona nisbətdə 10 mln ton yük daşınıb.
