Azərbaycan, Bakı, 10 iyun / Trend , müxbir N.İsmayılova /
"Azərbaycan Mərkəzi Bankı (AMB) nəzdində Azərbaycan İpoteka Fondunun (AİF) agent-banklar tərəfindən ipoteka kreditlərinin maliyyələşdirilməsinə 1 milyon manatlıq limit başlanğıc rəqəm sayılır və gələcəkdə artırıla bilər", - AMB-nin idarə heyətinin sədri Elman Rüstəmov deyib.
"Bu limit onunla şərtləndirilir ki, İpoteka Fondu 55 milyon manat məbləğində buraxılmış istiqrazların yerləşdirilməsindən vəsait əldə edəcək. Buna görə də başlanğıc mərhələdə hər bir səlahiyyətli bank 20 ipoteka kreditinin maliyyələşdirilməsi üçün 1 milyon manat əldə edəcək", - Rüstəmov bildirib.
Onun sözlərinə görə, banklar bu vəsaitlərdən istifadə edən kimi, limitlərinin artırılmasına yenidən baxıla bilər. Fondun 17 agent-bankı var.
2009-cu ilin dövlət büdcəsində sosial ipotekanın maliyyələşdirilməsi üçün 14,5 milyon manat nəzərdə tutulub. AMB başçısı onu da deyib ki, bu kreditlərin alınmasına hazırlıq da banklar tərəfindən başa çatdırılıb və dövlət büdcəsindən birinci tranşın alınması gözlənilir.
Ölkədə ipoteka kreditləşməsi 25 mart 2006-cı ildə, AİF standartlarına əsasən başlanılıb. 7 fevral 2007-ci ildən isə sosial ipotekanın verilməsinə başlanılıb. İpoteka kreditinə tələbat dövlət tərəfindən ayrılmaları arxada qoydu və 2007-ci ilin iyunundan etibarən AİF öz standartları ilə maliyyələşməni dayandırdı. Azərbaycanın 2005-2008-ci illərin dövlət büdcəsində AİF vasitəsilə ipotekanın maliyyələşdirilməsi üçün 94 milyon manat nəzərdə tutulub. Bu məbləğin 68 mln. manatı banklar vasitəsilə artıq verilib. 2009-cu ildə sosial ipotekanın maliyyələşdirilməsi üçün dövlət büdcəsində 14,5 mln. manat nəzərdə tutulub. AİF standartları ilə kredit portfeli 75 milyon manat, bankların ümumi ipoteka krediti portfeli isə 250-300 milyon manat təşkil edir.
Kreditlər üzrə faizlər 4-8 faiz arasında dəyişir. Bu, məbləğin 35-50 min manat civarında və 3-25 il müddətinə verilməsindən asılıdır.
İyunun 10-na olan rəsmi məzənnə 0,8037 AZN/USD təşkil edir.
Məqalə müəllifi ilə əlaqə ünvanı: [email protected]
