Azərbaycan, Bakı, 19 avqust / Trend , müxbir Ü.İsmayılova /
Azərbaycanın iri sığorta şirkətlərindən biri olan Atəşgah Sığorta ölkədə sığorta bazarının ixtisarına baxmayaraq, yığmın həcmini ilin sonunadək 12 milyon manata çatdırmaq niyyətindədir. Bunu çərşənbə günü şirkətin İdarə Heyətinin sədri Azər Əliyev deyib.
"İlin əvvəlində illik yığımı 15 milyon manat səviyyəsində proqnozlaşdırırdıq. Lakin bazardakı ixtisarla əlaqədar olaraq, poroqnozu 30 faiz təshih etmək qərarına gəldik", - Əliyev deyib.
2008-ci ilin yekununa görə, Atəşgah Sığorta 4,44 milyon manatlıq ödəmələrlə 16,35 milyon manat toplayıb.
Əliyevin sözlərinə görə, bazardakı vəziyyəti nəzərə almaqla, bu il səhmdarlar 2,7 milyon manat olan nizamnamə kapitalını artırmağı planlaşdırmırlar.
Atəşgah Sığorta şirkəti 1996-cı ildə yaradılıb. Şirkətin səhmdarları I.S.R. Holding Ltd (49 faiz səhm), ARDNŞ (30 faiz) və RAN-Eksim şirkətidir (21 faiz). İlin birinci yarısının yekununa görə, şirkətin sığorta pulu 2,19 milyon manatlıq ödəmələrlə 6,86 milyon manat təşkil edib.
Avqustun 19-na olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
