Azərbaycan, Bakı, 08 oktyabr / Trend , müxbir Ü.İsmayılova/
Azərbaycan Sığortaçılar Assosiasiyasının (ASA) icraçı direktoru Qafar Məcidov cümə axşamı bildirib ki, oktyabrın 15-də ASA-nın ümumi iclası keçiriləcək.
O deyib ki, iclasda İdarə Heyətinə yeni sədrin seçilməsi, gələn ilin büdcəsi və strateji inkişaf planı müzakirə olunacaq.
İdarə Heyətinə yeni sədr "Atesgah" Sığora Şirkətinin İdarə Heyətinin sədri Azər Əliyev seçiləcək. Qeyd edək ki, o, hazırda bu vəzifənin icraçısı olan MBASK Sığorta Şirkətinin İdarə Heyətinin sədri Cəmil Məlikovu əvəz edəcək. Cəmil Məlikov da öz növbəsində Standard Insurance Sığorta Şirkətinin İdarə Heyətinin sədri Kamal İbrahimovu əvəz etmişdi.
Məcidov deyib ki, ASA-nın ümumi yığıncağında gələn ilin büdcəsi də müzakirə olunacaq.
Onun sözlərinə görə, Müşahidə Şurasının sabahkı iclasında büdcənin ilkin variantı müzakirə olunacaq.
O deyib ki, sabahkı iclasın əsas mövzusu üzvlük haqqının artırılması və ya azaldılması olacaq. Qeyd edək ki, hazırda üzvlük haqqı dörd min manat təşkil edir.
Məcidovun sözlərinə görə, üzvlük haqqının dəyişdirilməsi gələn il ASA-nın administrativ və strateji planın inkişafı işlərinə ayrılacaq xərclərindən asılı olacaq.
Başlanğıcda ASA-ya üzvlük haqqı iki min manat həcmində müəyyən olunmuşdu. Daha sonra isə bu rəqəm dörd və beş min manata qədər artırıldı. Maliyyə böhranı ilə əlaqədar olaraq 2008-ci ildə üzvlük haqqı dörd min manata qədər azadılmışdı.
Azərbaycan Sığortaçılar Assosiasiyasının Müşahidə Şurasına Azərbaycanın beş sığorta şirkəti daxildir: MBASK, Standard Insurance, Beynəlxalq Sığorta Şirkəti, Azərsığorta, Atəşgah. Müşahidə Şurasının beş üzvündən hər biri bir il müddətinə assosiasiyaya sədrlik edir.
Azərbaycan Sığortaçılar Assosiasiyası 2006-cı ilin dekabr ayında təsis olunub.
Azərbaycanda 28 sığorta və bir təkrarsığorta şirkəti fəaliyyət göstərir ki, onlar da ASA-nın üzvüdürlər.
Məqalə müəllifi ilə əlaqə ünvanı: [email protected]
