Azərbaycan, Bakı, 09 oktyabr / Trend , müxbir N.İsmayılova/
Azərbaycan bankı Parabank ölkə regionlarında mikrokreditləşmənin genişləndirilməsində maraqlıdır. Bu barədə bankın xəzinə departamentinin direktoru Elnur Ağayev deyib.
Hazırda bankın kredit portfelinin 90 faizini kiçik və orta biznesin kreditləri təşkil edir. Kreditlər əsasən ticarət sektoruna və xidmət sahəsinə verilib. Onun sözlərinə görə, ölkədə 50 min dollaradək məbləğdə kreditlərə, yəni kiçik və orta biznes üçün mikrokreditlərə və kreditlərə böyük tələbat var.
"Kreditləşmənin bu növü Azərbaycanda böyük təsirə malikdir və sürətlə inkişaf edir. Mikrokreditlər və kreditlər iri kreditlərdən daha aktualdır", - Ağayev deyib.
Onun sözlərinə görə, istehsalat və ticarət bank üçün kreditləşmənin prioritet sahələridir. Buna görə də bank ölkə regionlarında mikrokreditləşmənin artırılmasında maraqlıdır.
"Bu məqsədlə bu il açılan bankın 7 filialından ikisi Bakıda, beşi isə regionlarda yerləşib. Gələn il biz regionlarda daha beş filial açmağı planlaşdırırıq", - Ağayev deyib.
Onun sözlərinə görə, İqtisadi İnkişaf Nazirliyi yanında Sahiblarlığa Kömək Milli Fondundan alınmış kredit xəttinin 700 min manatlıq vəsaitindən 250 min manatı artıq yerləşdirilib. Hazırda yeni biznes planları nəzərdən keçirilir. Kənd Təsərrüfatı Nazirliyi yanında Kənd təsərrüfatı Kreditləri üzrə Dövlət Agentliyinin 1 milyon manatlıq kredit xəttindən 200 min manatı artıq yerləşdirilib. Qalan vəsaitin də ilin sonunadək yerləşdirilməsi planlaşdırılır.
"Bank rəhbərliyi yerli fondlarla əlaqələri aktivləşdirmək və kreditləşməni onlar tərəfindən artırmaq niyyətindədir", - Ağayev deyib.
Hazırda bankın kredit portfeli 48 milyon manat təşkil edir. İlin sonunadək bu göstəricini 55-60 milyon manata çatdırmaq planlaşdırılır. Bankın aktivlərinin 85-90 milyon manat olması gözlənilir.
"Keçən il biz aktivlərin 100 milyon manatadək, kredit portfelinin isə 70 milyon manatadək artmasını proqnozlaşdırmışıq. Lakin dünya maliyyə böhranı xarici borcların alınmasını çətinləşdirdiyi üçün bu proqnozlara azalma istiqamətində yenidən baxılıb", - Ağayev belə deyib.
Bankın depozit bazası 48 milyon manat təşkil edir. Onlardan 42 milyonu depozit portfelinə, 3 milyon manatı isə istiqrazların subordinasiyasına buraxılıb. Depozit portfelinin 38 milyon manatını əhalidən cəlb edilmiş vəsaitlər təşkil edir. Cəlb edilmiş depozitlər üzrə bankın orta maliyyə qoyuluşu 16 faiz, verilən kreditlər üzrə isə 25 faiz təşkil edir.
Bank Kreditanstalt für Wiederaufbau (KfW), Islamic Bank Development Busines (ISDB), Europian Bank Reconstraction and Development (EBRD), International Finance Corporation (IFC), Black Sea Trade & Development Bank (BSTDB), Commerzbank AG (GEM), TBC Bank (GEO) kimi maliyyə institutları ilə əməkdaşlıq edir.
Bankın səhmdar tərkibi əsasən 18 fiziki şəxsdən (səhmlərin 99,9525 faizi) ibarətdir.
Oktyabrın 09-na olan rəsmi məzənnə 0,8033 AZN/USD təşkil edir.
Məqalə müəllifi ilə əlaqə ünvanı: [email protected]
