Azərbaycan, Bakı, 24 oktyabr / Trend , müxbir N.İsmayılova/
Azərbaycanda uzunmüddətli iqtisadi inkişafa həsr edilən forumun yekunları üzrə diversifikasiya gündəliyinin inkişaf etdirilməsi üçün fəaliyyət planı hazırlanıb, irəliləyişləri və nəticələri qiymətləndirmək üçün bir ildən sonra yeni forumun keçirilməsi barədə razılıq əldə olunub. Bu barədə Dünya Bankının (DB) Bakıdakı nümayəndəliyindən məlumat verilib. Oktyabrın 21-də Bakıda keçirilən forum Azərbaycan hökuməti və DB tərəfindən təşkil edilib. Forumda DB-nin sərəncamçı direktoru Nqozi Okonco-İveala iştirak edib.
Forumun işini ümumiləşdirərək xanım Okonco-İveala bildirib ki, forum Azərbaycanın öz iqtisadiyyatını diversifikasiya etməsi ilə bağlı konstruktiv dialoqa başlamaq imkanı verir. Onun sözlərinə görə, İrlandiya və Slovakiyanın təcrübəsini öyrənərək, ölkə iqtisadi artımın Azərbaycan modelini hazırlayacaq və bu model daxili və xarici bazarlara arxalanmanı tarazlaşdıracaq.
"Böhran nəticəsində iqtisadi mühitin dəyişməsi və neft qiymətlərinin volatilliyinin işığında Azərbaycan növbəti on il ərzində qeyri-neft ixracını kəskin şəkildə artıracaq", - məlumatda deyilir.
Beynəlxalq təcrübə göstərir ki, buna yalnız birbaşa xarici investisiyaların əhəmiyyətli dərəcədə artırılması yolu ilə nail olmaq olar. Forumda qeyd olunub ki, birbaşa xarici investisiyaların cəlb olunması və daxili sahibkarların yeni məhsullar və innovasiyalar tətbiq etməyə nail olmasının vacib elementləri makroiqtisadi sabitliyin saxlanılması, dinamik biznes mühitinin yaradılması və əhalinin təhsil və təlim bacarıqlarının yüksəldilməsidir.
Forumda vurğulanıb ki, 2003-2008-ci illərdə orta illik artım tempi 22 faiz təşkil edib və qısa müddət ərzində yoxsulluq səviyyəsi kəskin şəkildə azalıb.
"Qlobal böhran və Azərbaycanın neft gəlirlərinin tədricən sabitləşməsi amili ölkənin inkişafına yanaşmalara dəyişikliyi zəruri edir. Bu, 2020-ci ilədək ölkənin yuxarı gəlirli ölkəyə çevrilməsi üçün də zəruridir", - məlumatda deyilir.
Məqalə müəllifi ilə əlaqə ünvanı: [email protected]
