Azərbaycan, Bakı, 03 noyabr / Trend , müxbir Ü.İsmayılova/
Bakı Rieltorlar Assosiasiyası Bakının daşınmaz əmlak bazarının vəziyyəti barədə əhalinin məlumatlandırılması işinə başlayır. Bu barədə çərşənbə axşamı assosiasiyanın icraçı direktoru Elnur Azadov bildirib.
"Bu məqsədlə assosiasiya müntəzəm şəkildə "Bakı Əmlak" jurnalını nəşr etdirmək niyyətindədir", - Azadov bildirib.
Onun sözlərinə görə, yeni nəşrdə daşınmaz əmlak bazarının problemləri barədə informasiya, təhlillər və bazar xülasələri, tədqiqat materialları təqdim olunacaq. Jurnal bazar münasibətləri qaydalarını, əmlakın səmərəli istifadəsini təbliğ edəcək.
Jurnalda həmçinin bankirlərin, sığortaçıların, qiymət təyin edənlərin, konsaltinq şirkətlərinin, rieltorların və ölkənin daşınmaz əmlak bazarının digər iştirakçılarına diqqət ayrılacaq.
Azadovun sözlərinə görə, assosiasiyanın planlarına bazar iştirakçıları arasında əlaqələrin möhkəmlənməsi və tərəfdaş münasibətlərinin inkişafı üçün biznes-klubun yaradılması daxildir.
"Bakı Rieltorlar Assosiasiyası bütün fəal rieltorları öz sıralarına, ölkə rieltorları üçün şəraitin yaxşılaşdırılması və rieltorların hüquqlarının müdafiəsi üçün vahid iş strukturuna cəlb etmək niyyətindədir", - Azadov bildirib.
2008-ci ilin oktyabrında Bakı Rieltorlar Assosiasiyası Azərbaycan Ədliyyə Nazirliyində qeydiyyatdan keçib. Assosiasiyanın üzvləri 60 hüquqi və fiziki şəxsdir. Hüquqi şəxslər üçün üzvlük haqqı 300 manat, fiziki şəxslər üçün isə 150 manatdır.
Assosiasiyanın əsas məqsədləri Azərbaycanda rieltor fəaliyyəti standartlarının müəyyənləşdirilməsi, xüsusi peşəkar hazırlıq mərkəzinin yaradılması, həmçinin rieltorların sertifikasiya sisteminin tətbiqidir.
Məqalə müəllifi ilə əlaqə ünvanı: [email protected]
