Azərbaycan, Bakı, 3 aprel /Trend, müxbir N.İsmayılova/
Gəncə Bank depozit bazasının genişləndirilməsi məqsədilə ikiillik əmanətlər üzrə dərəcələri 42 faizədək artırıb. Bu barədə şənbə günü bankın idarə heyətinin sədri Fuad Musayev bildirib. Yarımillik əmanətlər illik 16 faiz, illik əmanətlər 19 faiz üzrə qəbul olunur.
"Əmanətlər iki valyutada - dollar və manatla qəbul olunur. Minimum limit 300 manatdır, aksiya bu il mayın sonunadək davam edəcək", - Musayev bildirib.
Onun sözlərinə görə, bank rəqabət qabiliyyətini artırmaq məqsədilə depozitlər üzrə dərəcələri artırıb. Hazırda bankın depozit portfeli üç milyon manatı ötür.
Gəncə Bank 1994-cü ildən fəaliyyət göstərir. Bankın baş ofisi Gəncədə yerləşir. Bank Azərbaycan Əmanətlərin Sığortalanması Fondunun (ADIF) üzvüdür.
2009-cu il yanvarın 1-dən ADIF üzvü olan banklarda illik 15 faizdən yuxarı dərəcə üzrə yerləşdirilən əmanətlər fond tərəfindən sığorta olunmur və onlara görə kompensasiyanın verilməsi nəzərdə tutulmur. Hazırda əmanətlər üzrə sığorta ödənişinin maksimum səviyyəsi 30 min manat təşkil edir.
Aprelin 3-nə olan rəsmi məzənnə 0,8034 AZN/USD təşkil edir.