Azərbaycan, Bakı, 3 avqust /Trend, müxbir N.İsmayılova/
Azərbaycan bankı "BTB Bank" Azərbaycan Beynəlxalq Bankının 100 faizlik mülkiyyətinə məxsus olan "Azericard" prosessinq mərkəzinə qoşulub. Bu barədə çərşənbə axşamı "Azericard" prosessinq mərkəzinin rəhbəri Cahangir Məmmədov deyib.
"Hazırda prosessinq mərkəzinə 30 bank qoşulub və potensial müştərilərlə danışıqlar aparılır", - Məmmədov bildirib.
Onun sözlərinə görə, prosessinq mərkəzi bu günədək 2 milyondan çox plastik kart buraxıb.
"BTB Bank" Vergilər Nazirliyində kommersiya fəaliyyəti üzrə dövlət qeydiyyatından 24 fevral 2010-cu il tarixdə keçib və martın sonunda ölkənin Mərkəzi Bankından bank fəaliyyətinin həyata keçirilməsi ilə bağlı lisenziya alıb. "BTB Bank" 12 milyon manat nizamnamə kapitalı ilə qeydiyyatdan keçib.
"Azericard" Azərbaycanda "MasterCard", "Visa" və "American Express" beynəlxalq ödəniş sistemləri tərəfindən tam sertifikatlaşdırılmış ilk prosessinq mərkəzidir. Hazırda "Azericard" həm Azərbaycanda, həm də ondan kənarda 30 bankı prosesləşdirir. Onlardan 25-i beynəlxalq ödəniş sisteminin üzvüdür.
