Azərbaycan, Bakı, 15 oktyabr /Trend, müxbir A.Axundov/
Yaxın vaxtlarda Azərbaycanda dövlət müəssisə və obyektlərinin real vəziyyətinə nəzarətin effektivliyinin artırılması üçün Əmlak Məsələləri Dövlət Komitəsinin regionlarda yerləşən ərazi idarələrində müəssisələr haqqında sistemləşdirilmiş informasiya bazası yaradılacaq. Bu barədə Komitənin cümə günü yayılan məlumatında deyilir.
Bu qərar dövlət mülkiyyətinin özəlləşdirilməsi zamanı şəffaflığın artırılması və bu prosesdə bütün şəxslərin bərabərhüquqlu iştirakının təmininə həsr olunan iclasda qəbul olunub.
İclasda özəlləşdirmə paylarının (çeklərin) tədavüldən çıxarılmasından sonra dövlət əmlakının özəlləşdirilməsinin yeni mexanizmlərinin tətbiqi ilə əlaqədar əhali arasında maarifləndirmə, geniş izahat və təbliğat işlərinin aparılmasının, bu istiqamətdə şəffaflığın və aşkarlığın təmin edilməsinin zəruriliyi vurğulanıb.
İclasda dövlət özəlləşdirmə paylarından (çeklər) istifadə etməklə keçirilən ixtisaslaşdırılmış çek hərraclarında, səhmlərin (payların, hissələrin) əmək kollektivi üzvlərinə və onlara bərabər tutulan şəxslərə güzəştli satışında, habelə digər satış üsullarında özəlləşdirmə paylarının (çeklərinin) geniş istifadəsinin və şəffaflığın daha da artırılmasının təmin edildiyi, hərracların və güzəştli satışın keçirilməsində bütün şəxslər üçün bərabərhüquqlu şəraitin yaradılması ilə bağlı qanunvericiliyə uyğun tədbirlərin görüldüyü vurğulanıb. Bundan başqa, dövlət müəssisələrində, nizamnamə kapitalında dövlətin payı olan səhmdar cəmiyyətlərdə və birgə müəssisələrdə əmlakın inventarlaşdırma işləri, dövlətə məxsus paylara görə dividendlərin ödənilməsi vəziyyəti barədə də müzakirələr aparılıb və bir sıra tapşırıqlar verilib. Belə ki, dövlət müəssisə və obyektlərində dövlət əmlakının qorunub saxlanması və ondan səmərəli istifadə sahəsində nəzarətin daha da gücləndirilməsi, bununla bağlı yerlərdə mütəmadi inventarlaşdırma tədbirlərinin keçirilməsinin zəruriliyi vurğulanıb.
Tədbirdə kadastr və inventarlaşdırma sahələrində aparılan işlərin səmərəliliyi və potensialının daha da artırılması, maddi-texniki bazasının möhkəmləndirilməsi və onun peşəkar kadrlarla komplektləşdirilməsi barədə tapşırıqlar verilib.
