Azərbaycan, Bakı, 8 dekabr/Trend, müxbir E.İsmayılov/
Çərşənbə günü Milli Məclisin Təbii ehtiyatlar, energetika və ekologiya komitəsi "Azərbaycan Respublikası Hökuməti və Rusiya Federasiyası Hökuməti arasında Samur transsərhəd çayının su ehtiyatlarının səmərəli istifadəsi və mühafizəsi sahəsində əməkdaşlıq haqqında" Sazişin təsdiq edilməsi barədə" qanun layihəsinin Milli Məclisə verilməsini tövsiyə edib.
İclas zamanı qeyd edilib ki, iki tərəfin əməkdaşlığını əks etdirən bu məsələnin uzun tarixi var və bunun nəticəsi sentyabrın 3-də Bakıda Samur çayının mühafizəsi və ondan istifadəyə dair Saziş imzalanması olub.
İclas zamanı Təbii ehtiyatlar, energetika və ekologiya komitəsinin sədri Valeh Ələsgərov qeyd edib ki, sazişin əsas məqsədi Samur çayının ekosisteminin qorunub saxlanması, tərəflərin təsərrüfat və digər ehtiyacları üçün çaydan istifadənin təmin edilməsidir. Sazişə əsasən, çayın ekosisteminin qorunması üçün həcmi 30,5 faizə bərabər müəyyən edilən ekoloji suburaxmanı çıxmaqla, onun sərhəd sahəsinin başlanğıcına daxil olan su ehtiyatları tərəflər arasında bərabər nisbətdə bölünür.
Ələsgərov onu da vurğulayıb ki, sazişin həyata keçirilməsi məqsədilə çayın su ehtiyatlarının bölünməsi üzrə Azərbaycan-Rusiya birgə komissiyası yaradılıb. Komissiya hər bir tərəfin təyin etdiyi iki həmsədrin rəhbərliyi altında fəaliyyət göstərir. Bununla yanaşı, komissiya suyun operativ bölüşdürülməsi üzrə işçi qrupu və işçi orqanları formalaşdırır. Bu orqanlar fəaliyyəti paritet əsasda təmin edirlər. Bundan başqa, komissiyanın səlahiyyətlərinə su bölgüsü və ekoloji suburxama həcmlərinin ongünlük qrafiklərini tərtib və təsdiq etmək, çayda suyun keyfiyyəti üzrə monitorinq proqramlarının işlənib hazırlanmasını və yerinə yetirilməsini təşkil etməklə fövqəladə vəziyyətlərin xəbərdarlıq edilməsi, onların təsirinin yüngülləşdirilməsi və ləğvi ilə əlaqədar birgə fəaliyyət qaydalarının müəyyənləşdirilməsi və digər məsələlər də daxildir.
