Azərbaycan, Bakı, 12 yanvar /Trend, müxbir Ü.İsmayılova/
Azərbaycan Dövlət Sosial Müdafiə Fondu (DSMF) 2013-cü ilin sonunadək ölkədə pensiya sisteminin tam avtomatlaşdırılması üzrə işləri tam başa çatdırmağı planlaşdırır. Bu barədə çərşənbə günü jurnalistlərə Fondun rəhbəri Səlim Müslümov deyib. Azərbaycanda pensiya sisteminin avtomatlaşdırılması "2009-2015-ci illərdə sığorta pensiya sisteminin inkişafı üzrə Dövlət Proqramı" çərçivəsində aparılır.
Sığorta pensiya sisteminin inkişafı üzrə dövlət proqramında sistemin avtomatlaşdırılması prosesinin 2013-2015-ci illərdə həyata keçirilməsinin nəzərdə tutulmasına baxmayaraq, biz bu işləri 2013-cü ilədək başa çatdırmağı planlaşdırırıq", - Müslümov qeyd edib.
Onun sözlərinə görə, bu prosesin tam başa çatdırılması məlumat bazasında hər pensiyaçı haqqında informasiyanın yığılması üzrə məsələ ilə bilavasitə əlaqədardır.
Layihə çərçivəsində 2006-cı il yanvarın 1-dən sonra pensiyaya çıxmış vətəndaşların yeni pensiya təminatı üçün baza məlumatlarının avtomatlaşdırılması aparılır. Layihənin həyata keçirilməsi başa çatdıqdan sonra hər ilin sonunda Fond icbari sosial sığorta üzrə hər bir ödəyicini onun fərdi hesabının vəziyyəti və orada yığılan məbləğ haqqında məlumatlandırcaq.
Layihənin əsas komponentləri avtomatlaşdırılmış idarəetmə sisteminin hazırlanması və tətbiqi, mərkəzləşdirilmiş arxiv sisteminin, prosessinq mərkəzinin, regional təlim mərkəzinin, ehtiyat server mərkəzinin və s. yaradılmasıdır.
Dövlət proqramının qəbul edilməsində əsas məqsəd pensiya təminatının sonrakı təkmilləşdirilməsinin təmin edilməsi, sığorta-pensiya sisteminin davamlı və dinamik inkişafına nail olmaqdır.
Proqrama əsasən, Dövlət Sosial Müdafiə Fondu məqsədləri təmin etməlidir:
- sığorta-pensiya sistemində sığorta prinsiplərinin gücləndirilməsi və qeyri-sığorta ödəmələrinin tənzimlənməsi mexanizmlərinin təkmilləşdirilməsi;
- 2006-cı il yanvarın 1-dək təqaüdə çıxmış əmək pensiyaçıların yeni pensiya təminatı sisteminə tam inteqrasiyasının təmin edilməsi;
- məcburi dövlət sosial sığortasının təkmilləşdirilməsi və konüllü pensiya sığortasının inkişaf etdirilməsi;
- əmək pensiyalarının yığım komponentinin fəallaşdırılması və qeyri-dövlət pensiya institutlarının formalaşdırılması və inkişaf etdirilməsi;
- sığorta-pensiya sisteminin cari ödəmə qabiliyyətinin, habelə orta və uzunmüddətli maliyyə dayanıqlığının təmin edilməsi;
- müasir informasiya-kommunikasiya texnologiyalarının tətbiqi.