Azərbaycan, Bakı, 16 fevral /Trend, müxbir N.İsmayılova/
Azərbaycan Mərkəzi Bankı (AMB) "AMB-də Təhsil İli" elan edilən 2011-ci ildə təhsil sahəsində tədbirlərin həyata keçirilməsi məqsədilə fəaliyyət konsepsiyası hazırlayıb. Bu barədə çərşənbə günü AMB Araşdırma və İnkişaf Mərkəzinin direktoru Emin Hüseynov Bakıda "Maliyyə savadlılığı" mövzusunda keçirilən simpoziumda deyib.
"Konsepsiya çərçivəsində "Virtual Mərkəzi Bank", "Elektron kitabxana" və "Bank işi üzrə elektron institut" kimi layihələrin reallaşdırılması nəzərdə tutulub", - Hüseynov bildirib.
Onun sözlərinə görə, konsepsiyanın həyata keçirilməsi məktəblilərin, tələbələrin, geniş ictimaiyyətin, eləcə də bank sektoru əməkdaşlarının seminarların, müzakirələrin və "dəyirmi masalar"ın təşkili vasitəsilə maarifləndirilməsinə yönəlib.
"Elektron universitet" layihəsi elektron təhsil üzrə resurslardan istifadəni, elektron kitabxanaların, onlayn sertifikatlaşdırılma proqramlarının və məsafə magistraturalarının yaradılmasını nəzərdə tutur. "Virtual Mərkəzi Bank" layihəsi virtual tur və bələdçilər, eləcə də AMB muzeyindən ibarətdir", - o, deyib.
Simpozium Almaniyanın İqtisadi Əməkdaşlıq və İnkişaf Nazirliyinin dəstəyi ilə Azərbaycan Banklar Assosiasiyası (ABA), Azərbaycan Bank Təhsili Mərkəzi (ABTM) və Almaniyanın Beynəlxalq əməkdaşlıq üzrə əmanət bankları Fondu tərəfindən keçirilir.
