...

Azərbaycanın vergi orqanları təxminən 18 min vergiödəyicinin pasportlaşdırılmasını aparıb

Biznes və iqtisadiyyat xəbərləri Materials 26 Fevral 2011 12:55 (UTC +04:00)

Azərbaycan, Bakı, 26 fevral /Trend, müxbir N.İsmayılova/

Bu gün Azərbaycanda təxminən 18 min vergiödəyici pasportlaşmadan keçib. Bu barədə şənbə günü jurnalistlərə vergilər nazirinin müavini Sahir Məmmədxanov bildirib.

"Bakı üzrə bu göstərici 10 mindən artıqdır, regionlarda isə 7-8 min vergiödəyicini əhatə edir. Bakıda pasportlaşma şənbə günləri, regionlarda isə cədvələ uyğun olaraq, ya həftə ərzində, ya da şənbə günləri aparılır", - Məmmədxanov deyib.

O bildirib ki, vergiödəyicilərdən əldə olunan məlumatlara görə, bu iş onlar üçün problem yaratmır. Bununla yanaşı, bütün vergiödəyicilərə tezislər formasında informasiya təqdim olunur. Lakin bu prosesdə vergi orqanlarında uçota durmayan obyektlərin aşkar ediləcəyi gözlənilir.

Fevralın 1-dən etibarən Vergilər Nazirliyi tərəfindən sahibkarlıq fəaliyyəti ilə məşğul olan vergiödəyicilərin və təsərrüfat subyektlərinin (obyektlərinin) pasportlaşdırılmasına başlanılıb. Pasportlaşdırma vergi əməkdaşlarının vergiödəyicilərin təsərrüfat subyektləri (obyektləri) olan ünvanlara getməklə fərdi müşahidələr, onların təqdim etdikləri məlumatlar və sorğular üzrə verdikləri cavablar əsasında həyata keçiriləcək. Vergiödəyicilərdən alınan məlumatlar vergiödəyicilərin pasportlaşdırılması formasına salınacaq. Pasportlaşdırmanın nəticələrinə əsasən məlumatlar yerli vergi orqanları tərəfindən ümumiləşdiriləcək və beş gün ərzində avtomatlaşdırılmış AVİS sisteminə daxil ediləcək, bundan sonra məlumatların inventarizasiya prosesinə başlanılacaq.

Xəbər lenti

Xəbər lenti