Azərbaycan, Bakı, 9 aprel/ Trend, müxbir N.İsmayılova/
2011-ci ilin fevralında Azərbaycan banklarının depozit bazası 0,5 faiz artıb, ilin əvvəlindən isə 4,4 faiz azalıb. Bu barədə Azərbaycan Mərkəzi Bankının (AMB) məlumatında deyilir.
AMB-nin məlumatına görə, martın 1-nə bank depozitlərinin, hüquqi və fiziki şəxslərin əmanətlərinin ümumi həcmi fevralın 1-nə olan 5181,8 milyon manta nisbətdə 5209,8 milyon manat təşkil edib. İlin əvvəlində isə bu göstərici 5448,8 milyon manat olub. Ümumi həcmin 2429,2 milyon manatı manat vəsaitinin payına, 2780,5 milyon manatı isə valyutanın payına düşüb.
Fevral ayı ərzində fiziki şəxslərin əmanətləri 2,3 faiz artıb, hüquqi şəxslərin depozitlərinin həcmi isə 27 faiz azalıb. İlin əvvəli ilə müqayisədə fərdi müştərilərin depozitləri 3,7 faiz artıb, korporativ müştərilərin depozitləri isə 14,6 faiz azalıb.
Hesabat dövrü ərzində fiziki şəxslərin ölkənin banklarındakı əmanətlərinin həcmi 3142,9 milyon manat təşkil edib. Bu göstərici fevralın əvvəlinə 3072,1 milyon manat, 2011-cu il yanvarın 1-nə isə 3029,8 milyon manat olub.
Martın əvvəlinə Hüquqi şəxslərin depozitlərinin həcmi 2066,9 milyon manat təşkil edib. Bu göstərici fevralın əvvəlinə 2109,7 milyon manat, yanvarın 1-nə isə 2419 milyon manat təşkil edib.
Aprelin 9-na olan rəsmi məzənnə 0,7923 AZN/USD təşkil edirt.
