Azərbaycan, Bakı, 12 aprel /Trend, müxbirlər A.Axundov, E.İsmayılov/
İlin sonunadək Azərbaycan Nəqliyyat Nazirliyi Buzovna-Mərdəkan-Qala avtomobil yolunun tikintisini başa çatdırmağı planlaşdırır. Trend-in məlumatına görə, bu barədə çərşənbə axşamı nəqliyyat nazirinin müavini Musa Pənahov bildirib.
"Bu layihə çərçivəsində tikinti işləri bu il davam etdiriləcək və ilin sonunadək layihənin həyata keçirilməsi başa çatdırılacaq", - Pənahov deyib.
Onun sözlərinə görə, yeni avtomobil yolu əvvəllər Bakının qəsəbələrinə elektrik qatarlarının hərəkət etdiyi dəmir yolunun yerləşdiyi yerdə tikilir.
Pənahovun sözlərinə görə, cari il ərzində Heydər Əliyev prospektindən istiqamət götürən, Mərdəkan, Bilgəh, Nardaran, Pirşağı qəsəbələri vasitəsilə Quba-Rusiya sərhədi avtomobil yoluna çıxan avtomobil yolunun tikintisi çərçivəsində işlərin davam etdirilməsi planlaşdırılır.
Bu layihə çərçivəsində işlərin çoxu artıq başa çatıb, lakin işlər sürətlə davam etdiriləcək və yol artıq gələn ilin ortalarında istismara veriləcək.
Pənahovun sözlərinə görə, hazırda Nəqliyyat Nazirliyi "20 yanvar" metro stansiyası yaxınlığında dairədə avtomobillərin hərəkətinin asanlaşdırılması variantlarını nəzərdən keçirir. Əvvəllər dairədə nəqliyyat problemlərini qismən həll edə bilən körpü tikilib. Əvvəlcədən bu körpünün tikintisi çərçivəsində Mətbuat prospektindən üçüncü mikrorayon istiqamətində tunelin salınması nəzərdə tutulmuşdu. Lakin bu ərazidən metro tunelinin keçməsi ilə əlaqədar bu layihənin həyata keçirilməsi qeyri-mümkün olub.
Onun sözlərinə görə, buna görə də bu dairədə avtomobil nəqliyyatı vasitələrinin hərəkətinin asanlaşdırmasını nəzərdə tutan alternativ variantlar müzakirə edilib. Yaxın gələcəkdə Nəqliyyat Nazirliyi bu layihə çərçivəsində tikinti işlərinə başlamağı planlaşdırır.
Yol təsərrüfatının yaxşılaşdırılması və inkişafı üzrə işlər təkcə Bakıda deyil, həm də ölkənin bütün regionlarında davam etdiriləcək.
