Azərbaycan, Bakı, 19 aprel /Trend, müxbir N.İsmayılova/
Qara dəniz Ticarət və İnkişaf Bankı (QTİB) Azərbaycanda real sektorun maliyyələşdirilməsinin genişləndirilməsində maraqlıdır. Bu barədə Trend-ə QTİB prezidenti Andrey Kondakov məlumat verib.
"Hazırda yerli banklarla əməliyyatların payı bizdə üstünlük təşkil edir və 100 faizə yaxındır. Qonşu Cənubi Qafqaz ölkələri ilə də təxminən belə vəziyyət müşahidə olunur. Biz Azərbaycan banklarını tanıyırıq, artıq onların çoxu ilə yaxşı əlaqələr qurmuşuq və bu əlaqələri inkişaf etdirmək və möhkəmləndirmək fikrindəyik. Bununla yanaşı, biz həmçinin Azərbaycandakı kredit portfelimizi şaxələndirmək, Azərbaycan iqtisadiyyatının real sektorunda layihələr tapmaq istəyirik. Bank və real sektorun 50:50 nisbətinə çıxmaq ideal olardı", - Kondakov bildirib.
Onun sözlərinə görə, QTİB-ə artıq bəzi şirkətlərdən, habelə Azərbaycan İnvestisiya Şirkətindən təkliflər daxil olub. Təkliflər kifayət qədər maraqlı görünür və aqrobiznes, alternetiv enerji də daxil olmaqla, energetika, tikinti, ətraf mühitin mühafizəsi kimi sahələri əhatə edir.
"Hazırda bankirlərimiz aktiv şəkildə bu təkliflər üzərində işləyirlər. Ümid edirik ki, onlardan bəzilərini yaxın vaxtlarda maliyyələşdirə biləcəyik", - Kondakov deyib.
Hələlik bankın real sektorda yeganə layihəsi "Bridge Plaza" biznes mərkəzi layihəsidir ki, QTİB bu layihəyə 4 milyon avro ayırıb. Bank Azərbaycan Beynəlxalq Bankı ilə birgə şüşə istehsalı zavodunun maliyyələşdirilməsinə isə 5 milyon avro həcmində maliyyə ayırıb.
"Biz real sektorda, o cümləədn infrastruktur, energetika, kiçik və orta sahibkarlığın inkişafı, ticari maliyyələşmə, aqrobiznes, emal sənayesi, İKT sahəsində iştirakımızı genişləndirmək istəyirik", - o deyib.
11 il ərzində bank Azərbaycanda 100 milyon dəyəri olan 20 layihəni maliyyələşdirib.
1996-cı ildə təsis edilən Qara dəniz Ticarət və İnkişaf Bankı 1999-cu il iyunun 1-də fəaliyyətə başlayıb. Albaniya, Azərbaycan, Bolqarıstan, Gürcüstan, Moldova, Ermənistan, Rumıniya, Rusiya Federasiyası, Türkiyə, Yunanıstan və Ukraynanın üzvü olduğu bankın baş ofisi Yunanıstanın Saloniki şəhərində yerləşir. Bank regional əməkdaşlığın inkişaf prinsiplərini dəstəkləyir, üzv ölkələrdə layihələrin maliyyələşdirilməsində və səhm kapitalında iştirak edir. QTİB-in kapitalında Azərbaycanın payı 5 faiz təşkil edir. Hazırda Yunanıstan, Rusiya və Türkiyə hər birinin payı 16,5 faiz olmaqla bankın iri səhmdarlarındandır. Rumıniya 14 faiz, Bolqarıstan və Ukrayna hər biri 13,5 faiz, Azərbaycan 5 faiz, Albaniya 2 faiz, Ermənistan və Moldova hər biri 1 faiz və Gürcüstan 0,5 faizə malikdir.
Qara dəniz Ticarət və İnkişaf Bankında Azərbaycandan olan idarəedici iqtisadi inkişaf naziri Şahin Mustafayev, onun müavini maliyyə naziri Samir Şərifovdur.
