Azərbaycan, Bakı, 23 aprel /Trend, müxbir A.Axundov/
Azərbaycan Sığortaçılar Assosiasiyasının (ASA) təsisçilərinin növbəti iclası üçüncü rübün əvvəlində olacaq. Bu barədə Trend-ə şənbə günü assosiasiyanın icraçı direktoru Azər Əliyev deyib. Bu qərar ASA-nın cümə günü keçirilən təsisçilər yığıncağında qəbul edilib.
"İclasda görülən işlər və ilin birinci yarısında xərclər haqqında hesabatlar dinləniləcək", - Əliyev qeyd edib.
Onun sözlərinə görə, səsvermədə bütün sığorta şirkətlərinin iştirakını tələb edən cari məsələlər də müzakirə olunacaq.
2006-cı il dekabrın 29-da əsası qoyulan və 28 üzvü birləşdirən assosiasiyanın əsas məqsədi Azərbaycanda fəaliyyət göstərən sığorta şirkətlərinin, eləcə də təkrar sığorta şirkətlərinin inkişafına kömək göstərməkdən, onların sosial-iqtisadi, informasiya və digər proqramlarının inkişafı, göstərilən sahələrdə onların biliklərinin artırılmasından ibarətdir.
Azərbaycanda 28 sığorta və bir təkrar sığorta şirkəti fəaliyyət göstərir.
