Azərbaycan, Bakı, 4 may /Trend, müxbir A.Axundov/
Azərbaycanın sığorta şirkəti "Meqa Sığorta"nın ilin birinci rübündə həyata keçirdiyi yığımların 75 faizdən çoxu avtonəqliyyat vasitələrinin sığortasının payına düşüb. Bu barədə çərşənbə günü Trend-ə şirkətin PR meneceri Elnur Eyvazov deyib.
Şirkətin 3 ay ərzində yığımlarının ümumi həcmi 36 213,94 manat olub. Bunun 34 309,94 manatı sığortanın könüllü növlərinin payına düşüb. Bu müddət ərzində ödəniş edilməyib.
Şirkət fərdi sığorta üzrə 599,53 manat, avtonəqliyyat vasitlərinin sığortası üzrə 27 288,51 manat, yanğın və digər risklərdən sığorta üzrə 2 536 manat, yük sığortası üzrə 2 330,9 manat, vətəndaş məsuliyyəti sığortası üzrə 1 555 manat yığıb.
Avtonəqliyyat vasitələri sahiblərinin icbari sığortası üzrə "Meqa Sığorta" 484 manat məbləğdə sığorta haqqı yığıb. Yanğından icbari sığorta üzrə haqlar 540 manat, icbari ekoloji sığorta üzrə 880 manat məbləğdə həyata keçirilib.
"Meqa Sığorta" ASC yeni brend altında 1 oktyabr 2010-cu ildən fəaliyyətə başlayıb, 29 sığorta növü üzrə xidmət göstərir. Onların dördü icbari sığorta növüdür.
Mayın 4-nə olan rəsmi məzənnə 0,7912 AZN/USD təşkil edir.