Azərbaycan, Bakı, 12 may /Trend, müxbir İ.Xəlilova/
Azərbaycanın ən iri lizinq şirkəti olan "Joint Leasing" 2011-ci ildə portfelinin 20-25 faizədək artacağını gözləyir. Bu barədə cümə axşamı "Joint Leasing" şirkətinin baş direktoru Elçin Əhmədov bildirib.
"Hazırda şirkətin lizinq portfelinin genişləndirilməsi üçün Yaponiya, Koreya avadanlıqlarının alınması üçün ixrac-idxal sxemlərindən istifadə imkanlarına baxılır. Lakin biz portfelin sıçrayışlı böyüdülməsini istəməzdik, ona görə də onu hazırkı səviyyə üstəgəl hardasa 20-25 faizədək artımla saxlamaq niyyətindəyik", - Əhmədov deyib.
"Bu il biz ölkənin lizinq bazarının gələcək inkişafının necə gedəcəyinə baxılmasını istərdik", - Əhmədov bildirib.
Hazırda "Joint Leasing" ölkənin lizinq bazarında gəlirliliyinə görə aparıcı mövqe tutur, lizinq portfelinin həcminə görə birinci-ikinci yerləri bölüşür. Ötən il şirkətin mənfəəti 1,2 milyon manat, 2009-cu ildə 1,8 milyon manat təşkil edib.
2011-ci il aprelin 1-nə olan vəziyyətə görə, şirkətin lizinq portfeli 29,5 milyon manat təşkil edərək ötən ilin analoji dövrü ilə müqayisədə 1,83 milyon manat artıb.
Şirkət avans nəzərə alınmaqla il ərzində 3,5 milyon manat artımla 42 milyon manat məbləğdə layihələri maliyyələşdirib, cəmi 164 sövdələşmə bağlayıb.
Şirkətin maliyyələşdirdiyi layihələr iqtisadiyyatın tikinti, nəqliyyat, qida və yüngül sənaye, ticarət və xidmətlər kimi sahələrini əhatə edib.
Hazırda lizinqin maliyyələşdirilməsi üzrə orta faiz dərəcələri "Joint Leasing" tərəfindən 20 faizdən 30 faizədək avans ödənişlə və 3 il müddətinədək 19-20 faiz müəyyənləşdirilib. Ötən il faiz dərəcələri orta hesabla 21-22 faiz səviyyəsində olub.
Azərbaycanın iri lizinq şirkəti olan "Joint Leasing" Company 2007-ci ilin 14 iyun tarixindən etibarən "Azərlizinq" şirkətinin hüquqi varisi kimi fəaliyyət göstərməyə başlayıb. Şirkətin təsisçiləri Böyük Britaniyanın "DH Leasing LTD" şirkəti (52, 3%) və Azərbaycan Beynəlxalq Bankıdır (47,6%). Şirkətin nizamnamə kapitalı hazırda 700 min manat təşkil edir.
Mayın 12-nə rəsmi məzənnə 0,7908 AZN/USD təşkil edir.
