Azərbaycan, Bakı, 16 may /Trend, müxbir N.İsmayılova/
2011-2013-cü illərdə Bakı şəhəri və onun qəsəbələrinin sosial-iqtisadi inkişafı üzrə Dövlət Proqramı Abşeron magistral kanalının yenidən qurulmasını nəzərdə tutur. Bu barədə iqtisadi inkişaf naziri Şahin Mustafayev AzTV dövlət telekanalına müsahibəsində bildirib. Dövlət Proqramı Azərbaycan Prezidenti İlham Əliyevin sərəncamı ilə 2011-ci il mayın 4-də təsdiqlənib.
"Bu gün uzunluğu 73 kilometr təşkil edən Abşeron magistral kanalının vəziyyəti qeyri-qənaətbəxş hesab edilir və onun əsaslı təmirə ehtiyacı var. Su stansiyalarının yaradılmasına da ehtiyac var", - Mustafayev bildirib.
Nazirin sözlərinə görə, proqramda su kanalının təmiri, təsərrüfat subyektləri arasındakı magistral su kəmərlərinin tikintisi nəzərdə tutulub.
"Nəticədə 27 min hektar ərazini əhatə edən suvarma sistemi yaradılacaq və yaxşılaşdırılacaq. Belə infrastrukturun yaradılması xüsusilə istixanaların qurulduğu və kənd təsərrüfatının inkişaf etdiyi Bakı qəsəbələrində sahibkarlığın inkişafına yardım edəcək", - nazir deyib.