Azərbaycan, Bakı, 4 iyul /Trend, müxbir İ.Xəlilova/
Dünya Bankı (DB) iki ildən sonra Bakıda bərk məişət tullantılarının kompleks idarə edilməsi layihəsinin əhatəsini bütün respublika üzrə genişləndirə bilər. Bu barədə bazar ertəsi Trend-ə bankın Bakı nümayəndəliyindən məlumat verilib.
"2013-2014-cü illərdə Azərbaycanla tərəfdaşlıq strategiyası çərçivəsində Bakı üzrə layihənin həyata keçirilməsi zamanı əldə olunan yaxşı təcrübə nəzərə alınmaqla onun ölkənin digər rayonları üzrə genişləndirilməsinə baxılır", - nümayəndəlikdən bildiriblər.
Layihənin həyata keçirilməsi 2009-cu ildə başlayıb və 2013-cü ilədək davam edəcək. Layihənin ümumi dəyəri 41,5 milyon dollar təşkil edir. Lakin bu vəsait Bakı üzrə təsisat islahatları, potensial və idarəetmənin artırılması, Balaxanı bərk tullantılar poliqonunun nizamlanması və idarə edilməsi, digər poliqonların və idarələrin bağlanması, bərk tullantıların yığılması üçün avadanlığın əldə edilməsi, layihə başa çatandan sonra investisiya planının hazırlanması üçün nəzərdə tutulub.
DB nümayəndəliyindən verilən məlumata görə, bu layihənin bütün respublika üzrə genişləndirilməsi üçün Azərbaycanda bərk məişət tullantılarının kompleks idarə edilməsi strategiyasının hazırlanması vacibdir. Hazırda 20 illik dövrü əhatə edən strategiya Bakı üçün hazırlanır.
1992-ci ildə DB-yə qoşulduğu vaxtdan Azərbaycana 43 layihənin həyata keçirilməsi üçün 2,9 milyarda yaxın vəsait ayrılıb.
