Azərbaycan, Bakı, 14 sentyabr /Trend, müxbir A.Axundov/
Bakı Fond Birjası ölkə fond bazarında korporativ qiymətli kağızlarla bağlı yeni aləti işə salmağı planlaşdırır.
"Hazırda biz korporativ repo bazarının təşkili üzərində çalışırıq", - çərşənbə günü BFB-nin İdarə Heyətinin sədri Xəyal Abdinov deyib.
Onun sözlərinə görə, həmin alətin gələn ildən tam işə salınması üçün ilin sonunadək bütün texniki detalların təkmilləşdirilməsi planlaşdırılır.
Korporativ qiymətli kağızlar bazarı Azərbaycanda yüksəliş dinamikası nümayiş etdirməyə davam edir, belə ki, o, ümumilikdə iqtisadiyyatın artımını və maliyyə sahəsinin artımını ötüb keçir. 2011-ci ilin yanvar-avqustunda korporativ qiymətli kağızların dövriyyəsi keçən ilin müvafiq dövrilə müqayisədə 1,4 dəfə artaraq 389,1 milyon manat təşkil edib. Bu, korporativ istiqrazlar üzrə əməliyyatların həcminin 1,75 dəfə artımı ilə izah olunur.
Sentyabrın 14-ə olan rəsmi məzənnə 0,7866 AZN/USD təşkil edir.
