Azərbaycan, Bakı, 10 oktyabr /Trend, müxbir E.İsmayılov/
TRACECA (Avropa, Qafqaz, Asiya) nəqliyyat dəhlizinin Xəzər və Qara dənizləri magistralı və logistik proseslər üzrə texniki layihəsi çərçivəsində Poti-Tbilisi-Bakı marşrutu üzrə və daha sonra Mərkəzi Asiyadan Çin sərhədlərinə qədər konteyner axınının yenilənməsi üçün işlər aparılacaq. Bu barədə bazar ertəsi Trend-ə TRACECA-nın Azərbaycandan olan milli katibi Akif Mustafayev məlumat verib.
Onun sözlərinə görə, müvafiq araşdırmaların və işlərin aparılması məsələsi Qara dəniz limanlarından Azərbaycana, sonra isə Xəzər dənizi vasitəsilə Mərkəzi Asiyaya konteyner axınının stabilləşdirilməsi baxımından vacibdir.
"Bu araşdırmalar dəniz magistralı və logistik proseslər üzrə texniki layihə çərçivəsində aparılacaq. Bu sahədə araşdırmalar tövsiyə xarakteri daşıyacaq və bütün bunların həyata keçirilməsi üçün TRACECA-ya üzv ölkələrin dövlət strukturlarının fəaliyyətinin aktivləşdirilməsi vacibdir", - Mustafayev bildirib.
Həmçinin, həmin texniki layihə çərçivəsində Bakı-Aktau və Bakı-Türkmənbaşı marşrutları üzrə ro-ro əlaqələr və bərə sahəsində də araşdırmaların aparılması planlaşdırılır.
"Bu, göstərilən marşrutlarla daşımaların rəqabətə davamlılığı baxımından vacibdir", - Mustafayev deyib.
Onun sözlərinə görə, TRACECA-nın yeni texniki layihəsinin reallaşdırılması bu ilin ikinci rübündən başlayıb və üç il ərzində həyata keçiriləcək. Bu müddət ərzində araşdırmalar, təhlillər aparılacaq, bu məsələ ilə bağlı treninqlər keçiriləcək, eləcə də TRACECA-ya üzv ölkələrə təklif və tövsiyələr təqdim olunacaq.
TRACECA Aİ və Şərqi Avropa, Cənubi Qafqaz və Mərkəzi Asiyada onun tərədaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda daimi katibliyi var.
Hazırda TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.