Azərbaycan, Bakı, 14 noyabr /Trend, müxbir N.İsmayılova/
Nazirlər Kabineti "Azərbaycan Respublikası Mərkəzi Bankının normativ xarakterli aktlarının hazırlanması və qəbul edilməsi Qaydası"nı təsdiq edib. Trend-in məlumatına görə, bu barədə bazar ertəsi Kabinetin saytında dərc olunmuş məlumatda deyilir.
Qaydaya əsasən, Mərkəzi Bankın normativ xarakterli aktları İdarə Heyəti tərəfindən qəbul edilir və Mərkəzi Bankın sədri tərəfindən imzalanır. Mərkəzi Bankın normativ xarakterli aktları Azərbaycan Respublikasının Hüquqi Aktların Dövlət Reyestrinə daxil edilmək məqsədi ilə həmin aktların qəbul edildiyi gündən 3 gün keçənədək Azərbaycan Ədliyyə Nazirliyinə göndərilir.
Mərkəzi Bankın normativ xarakterli aktları, həmin aktlarda qüvvəyə minmənin daha gec müddəti nəzərdə tutulmadıqda, Dövlət Reyestrinin elektron variantında dərc edildiyi gündən qüvvəyə minir.
Qaydada qeyd olunur ki, zəruri hallarda, o cümlədən yeni hüquqi aktın qəbul edilməsi ilə əlaqədar Mərkəzi Bank qüvvədə olan normativ xarakterli aktlarında müvafiq dəyişikliklər edir. Normativ xarakterli aktlarının yeni qəbul edilmiş hüquqi akta uyğunlaşdırılması zərurəti olmadıqda, Mərkəzi Bank Azərbaycan Respublikasının Ədliyyə Nazirliyinə müvafiq məlumat verir.
