Azərbaycan, Bakı, 24 noyabr /Trend, müxbir İ.Xəlilova/
2013-cü ildə Azərbaycanda ünvanlı sosial yardımların (ÜSY) məbləğinin müəyyən edilməsi üçün istifadə olunan ehtiyac meyarının səviyyəsi yaşayış minimumu ilə bərabərləşdiriləcək. Trend-in məlumatına görə, bu barədə cümə axşamı Parlamentin Sosial siyasət komitəsinin sədri Hadı Rəcəbli 2012-ci il və sonrakı üç il üçün dövlət büdcəsi layihəsinin Milli Məclisdəki müzakirəsi zamanı bildirib.
2012-ci ildə ehtiyac meyarının səviyyəsinin indiki 75 manatdan 84 manata çatdırılması planlaşdırılır.
Dövlət büdcəsi layihəsinə görə, 2013-cü ildə bu göstərici 92 manata, 2014-cü ildə 100 manata, 2015-ci ildə 106 manata çatdırılacaq.
Gələn il ölkə üzrə yaşayış minimumu hazırkı 95 manatdan 108 manatadək, eləcə də əhalinin əməkqabiliyyətli hissəsi üçün 102 manatdan 116 manatadək, pensiyaçılar üçün 72 manatdan 84 manatadək və uşaqlar üçün 76 manatdan 87 manatadək artırılacaq.
2013-cü ildə Azərbaycanda yaşayış minimumunun 120,2 manata, 2014-cü ildə 127,7 manata, 2015-ci ildə 135,1 manata çatdırılması planlaşdırılır.
Bununla yanaşı, 2013-cü ildə əmək qabiliyyətli əhali üçün yaşayış minimumunun 130 manata, 2014-cü ildə 138 manata, 2015-cü ildə 146 manatadək, pensiyaçılar üçün 2013-cü ildə 101 manata, 2014-cü ildə 107 manata, 2015-cü ildə 114 manata, uşaqlar üçün 2013-cü ildə 99 manata, 2014-cü ildə 106 manata, 2015-cü ildə 112 manatadək artırılacağı proqnozlaşdırılır.
Proqnozlara görə, 2012-ci ildə minimum əməkhaqqı 2010-cu və 2011-ci ildəki 85 manat səviyyəsindən 93,5 manatadək artırılacaq. 2013-cü ildə bu göstərici 120,2 manata, 2014-cü ildə 127,7 manata, 2015-ci ildə 140 manata çatdırılacaq.
Layihəyə görə, sosial müavinətlərin minimum məbləği 10 manat təşkil edəcək və hər il beş manat artaraq 2015-ci ildə 25 manat olacaq. Ötən il olduğu kimi, cari ildə də sosial müavinətlərin minimum məbləği 5 manat təşkil edəcək.
2015-ci ilədək doktorantlar, tələbələr və şagirdlər üçün təqaüdlərin minimum məbləğində dəyişiklik gözlənilmir - yaxın dörd il ərzində 30 manat səviyyəsində saxlanacaq.
Noyabrın 24-nə olan rəsmi məzənnə 0,7865 AZN/USD təşkil edir.