Azərbaycan, Bakı, 30 noyabr /Trend, müxbir N.İsmayılova/
Hazırda Azərbaycanda vergi ödəyicisi olan fiziki şəxslərin ümumi sayının 30 faizi elektron qaydada uçota alınıb. Trend-in məlumatına görə, bu barədə çərşənbə günü Azərbaycan Vergilər Nazirliyinin "Vergilər" qəzetində dərc edilən məlumatda deyilir.
Vergilər Nazirliyi 2011-ci il iyulun 1-dən başlayaraq hüquqi şəxs yaratmadan sahibkarlıq fəaliyyəti göstərən fiziki şəxslərin elektron qaydada vergi uçotuna alınmasına başlayıb.
"Ötən müddət ərzində respublika üzrə 7956 (30 faiz), o cümlədən Bakı şəhəri üzrə 2618 (23 faiz) fiziki şəxs elektron qaydada uçota alınıb", - məlumatda deyilir.
Bundan başqa, ötən müddət ərzində elektron ödəniş sisteminin yaradılması məqsədilə Vergilər Nazirliyi tərəfindən Mərkəzi Bankla danışıqlar aparılıb və büdcə təsnifatları, xəzinədarlıq orqanları, vergi ödəyicilərinin sayı, daxilolmalar üzrə tranzaksiyaların sayı və daxilolmaların məbləğləri barədə statistik məlumatlar hazırlanaraq Mərkəzi Banka təqdim edilib.
Həmçinin, Maliyyə və Vergilər nazirliklərinin və Mərkəzi Bankın nümayəndələrinin iştirakı ilə keçirilmiş birgə görüşlərdə vergi və rüsumların elektron ödənilməsinin təmin edilməsi ilə bağlı texniki məsələlər müzakirə edilib.
Dəgər tərəfdən, elektron qeydiyyatın tətbiqi ilə bağlı normativ hüquqi aktlarda əlavə və dəyişikliklər edilməsi barədə ilkin təkliflər hazırlanıb. Hazırda təkliflərin qiymətləndirilməsi və yekun layihələrin hazırlanması işləri yerinə yetirilir.
Noyabrın 30-na olan rəsmi məzənnə 0,7864 AZN/USD təşkil edir.