Azərbaycan, Bakı, 26 dekabr / Trend müxbir E.İsmayılov/
Azərbaycanın Dövlət Mülki Aviasiya Administrasiyasının direktoru Arif Məmmədov Avropa Mülki Aviasiya Konfransının (ECAC) 137-ci iclası çərçivəsində ECAC prezidenti Katalin Radu ilə respublikanın işğal altında olan ərazisində yerləşən Xocalı aeroportunda qanunsuz tikinti işlərinin aparılması məsələsini müzakirə edib. Trend-in məlumatına görə, bu barədə bazar ertəsi administrasiyanın məlumatında deyilir.
"Müəyyən dairələrin regionda uçuşların təhlükəsizliyinə xələl gətirmək cəhdləri ilə bağlı Azərbaycan tərəfinin narahatlığı ЕСАС rəhbərliyinin nəzərinə çatdırılıb. Tərəflər 2012-ci ildə qarşılıqlı məsləhətləşmələri davam etdirmək barədə razılığa gəliblər", - məlumatda deyilir.
İclas zamanı Avropa Komissiyası 2012-ci ilin əvvəllərində ölkəmizlə "Birgə səma" Sazişi ilə bağlı danışıqlara başlamaq təklifi ilə çıxış edib.