Azərbaycan, Bakı, 11 yanvar /Trend, müxbir N.İsmayılova/
Azərbaycan bankı "Unibank" ölkənin bank bazarında öz payını artırmağı planlaşdırır. Bu barədə Trend-ə çərşənbə günü bankdan məlumat verilib.
"Bu günə ölkənin bank bazarında bizim payımız təxminən beş faiz təşkil edir. Bununla yanaşı, ölkənin yeganə dövlət bankı olan Azərbaycan Beynəlxalq Bankının (ABB) payına bazarın təxminən 40 faizi düşür. ABB-ni çıxmaqla Unibank-ın bazarda xüsusi çəkisi 10 faizi ötür", - bankdan bildiriblər və qeyd ediblər ki, bank bazarında Unibank-ın payının artırılması strateji vəzifələrdən biridir.
"Bank bu istiqamətdə aktiv iş aparır və onun strategiyasına görə, bu göstəricinin əhəmiyyətli dərəcədə artırılmasını planlaşdırır, lakin onun iki dəfə artırılmasından danışmaq hələ tezdir", - bankdan bildiriblər.
"Unibank" ölkədə fiziki şəxslərin kreditləşməsinin sayına və həcminə görə üçüncü, pərakəndə biznes üzrə aktiv çalışan aparıcı banklardan biridir. Bank, habelə öz qarşısına əməliyyat gəlirlərinin xüsusi çəkisinin artırılmasını da məqsəd qoyub.
"Unibank" 2002-ci il oktyabrın 15-də iki özəl kommersiya bankı - "Mbank" və "Promtekhbank"ın birləşməsi nəticəsində yaranıb. "Unibank" universal maliyyə-kredit müəssisəsidir, pərakəndə və korporativ xidmətlər təklif edir.
Avropa Yenidənqurma və İnkişaf Bankı (15,1515 faiz) və DEG Almaniya İnvestisiya Korporasiyası (8,3333 faiz) kimi maliyyə institutları bankın səhmdarlarıdır. Bank 24 filial və şöbəsi vasitəsilə Bakıda, Sumqayıtda və Azərbaycanın daha altı əsas rayonunda 172 mindən artıq müştəriyə xidmət göstərir.
Yanvarın 11-nə olan rəsmi məzənnə 0,7863 AZN/USD təşkil edir.
