Azərbaycan, Bakı, 29 fevral / Trend, müxbir A.Axundov /
Azərbaycanın Standartlaşdırma, Metrologiya və Patent üzrə Dövlət Komitəsi standartlaşdırma, sertifikatlaşdırma qaydaları və digər normativ sənədləri özündə cəmləşdirən elektron bazanın formalaşdırılması sahəsində işləri davam etdirir. Trend-in məlumatına görə, bu barədə komitənin sədri Ramiz Həsənovun çərşənbə günü rəsmi mətbuatda dərc olunmuş müsahibəsində deyilir.
Onun sözlərinə görə, komitə 2011-ci ildə 77 standartı təsdiqləyib.
"2011-ci ildə komitə tərəfindən qida sənayesi üzrə 26, neft-kimya sahəsində 15, elektrotexnika sahəsində 5, nəqliyyat üzrə iki, ekologiya üzrə 9, inşaat üzrə 5, başqa sahələr üzrə 15 standart işlənib hazırlanıb və dövlət qeydiyyatına alınıb", - Həsənov deyib.
Onun sözlərinə görə, ötən il ərzində 217 ədəd yeni ölçmə vasitələrinin tipi təsdiqlənib. "Onlar respublikanın ölçmə vasitələrinin Dövlət Reyestrinə daxil edilib", - Həsənov deyib.
Onun sözlərinə görə, 2011-ci ildə komitə tərəfindən 1250 əmtəə nişanı, 111 ixtiraya dair patent, 43 sənaye nümunəsinə dair patent, 9 faydalı modelə dair patent verilib.