Azərbaycan, Bakı, 2 may /Trend, müxbir A.Axundov/
Azərbaycanda karbohidrogenlərin hasilat həcminin artımının dayanması ortamüddətli perspektivdə vergi-büdcə sahəsinin sabitliyinin təmin edilməsi məqsədilə tezliklə büdcə konsolidasiyasına keçidin vacibliyini göstərir. Trend-in məlumatına görə, bu barədə çərşənbə günü Bakıda BVF-nin Yaxın Şərq və Mərkəzi Asiya Departamentinin şöbə müdirinin müavini Nadim İlahi missiyanın yekunlarına həsr edilmiş mətbuat konfransında bildirib.
"Biz hökumətlə büdcənin sabitliyinin qorunması məsələləri ilə bağlı daim müzakirələr aparırıq. Fikrimizcə, ölkənin vergi-büdcə siyasətinə gələcəkdə düzəlişlər edilməlidir", - İlahi deyib.
Onun sözlərinə görə, hazırda dövlət büdcəsinin defisiti neft sahəsi nəzərə alınmadan olduqca böyükdür.
"Ölkə hökuməti neft gəlirlərini ölkənin inkişaf proseslərinin dəstəyinə yönəldir. Gələcəkdə büdcənin xərclərinin belə yüksək səviyyədə saxlanılması mümkün olmayacaq, elə bununla əlaqədar dəyişikliklər lazımdır", - İlahi qeyd edib.
Onun fikrincə, bunun üçün qeyri-neft sektoru gələcəkdə ölkə iqtisadiyyatının qabaqcıl qüvvəsi olmalıdı.