Azərbaycan, Bakı, 23 may /Trend, müxbir Ə.Həsənov/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) Mingəçevir şəhərində prioritet hesab olunan sahələr üzrə sahibkarlardan investisiya layihələrinin qəbuluna başlayıb.
Mayın 18-də Mingəçevir şəhərində keçirilən tədbir çərçivəsində yerli icra hakimiyyəti orqanlarının nümayəndələri və sahibkarlarla mövcud iqtisadi potensialdan daha səmərəli istifadə edilməsi məqsədilə müzakirələr aparılıb. Nəticədə iqtisadiyyatın inkişafı üçün aşağıdakı prioritet istiqamətlər müəyyənləşdirilib:
- müasir texnologiyalara əsaslanan müxtəlif sənaye müəssisələrinin yaradılması;
- kiçik və orta həcmli istixana təsərrüfatlarının yaradılması;
- kiçik və orta həcmli müasir çörək zavodlarının yaradılması.
Bu gündən etibarən sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə Fonda müraciət edə bilərlər.
Əlavə məlumat üçün SKMF-yə müraciət etmək olar. Ünvan: Bakı şəhəri, Yasamal rayonu, A.M.Şərifzadə küçəsi, 172. Telefon: (012) 434-74-29, Faks: (012) 432-37-17. e-mail: [email protected]