Azərbaycan, Bakı, 9 iyul /Trend, müxbir A.Axundov/
Mayda Azərbaycan Mərkəzi Bankı (AMB) yanında Mərkəzləşdirilmiş Kredit Reyestri Xidmətinə 80 361 müraciət daxil olub. Trend-in məlumatına görə, bu barədə bazar ertəsi AMB-nin saytında yerləşdirilən məlumatda deyilir.
2011-cu ilin analoji dövr göstəricisi (461 598 sorğu) ilə müqayisədə Xidmətə müraciətlərin sayı 1,72 faiz artıb.
Mayda banklardan Xidmətə 80 169 sorğu daxil olub, 192 nəfər öz kredit tarixçəsi barədə məlumat almaq məqsədilə müraciət edib.
May ayının sonuna olan məlumata görə, kredit reyestrində haqqında məlumat olan borc götürənlərin sayı 1 301 103, kredit məlumatlarının ümumi sayı isə 3 324 372 təşkil edir.
Reyestrdə olan zaminlər haqqında məlumatların sayı 469 206 təşkil edir.
Qeyd edək ki, Mərkəzləşdirilmiş Kredit Reyestri Xidməti 2005-ci ilin martından fəaliyyət göstərir.
