Azərbaycan, Bakı, 16 avqust /Trend, müxbir A.Axundov/
2012-ci ilin I yarımili ərzində Milli Ödəniş Sistemində ümumi həcmi 55,381 milyon manat olmaqla, 12,209 milyon ədəd əməliyyat aparılıb. Ötən ilin müvafiq dövrü ilə müqayisədə əməliyyatların sayı 57,8 faiz (4472 min ədəd), ümumi həcmi isə 23,6 faiz (10 566 mln. manat) artıb. Bu barədə Azərbaycan Mərkəzi Bankının ilin birinci yarısının yekunları üzrə maliyyə sabitliyi haqqında hesabatında deyilir.
Hesabat dövründə ödənişlərin orta günlük sayı 92,5 min ədəd, ümumi həcmi isə 419,6 mln. manat təşkil edib (ötən ilin eyni dövründə müvafiq olaraq 58,6 min. ədəd və 339,5 mln. manat).
Nağdsız ödənişlərin 91,1 faizi AZİPS sistemi vasitəsilə həyata keçirilib və onun ümumi həcmi 50 477 mln. manat olub (217 min. ədəd əməliyyat). Ötən ilin eyni dövrü ilə müqayisədə əməliyyatların ümumi həcmi 27,6 faiz (47 000 mln. manat) artıb. Hər bir ödəniş sənədinin məbləği orta hesabla 240,8 min. manat təşkil edib.
Məbləğ baxımından ödənişlərin 8,6 faizi (4,9 mln.manat) XÖHKS sistemi vasitəsilə həyata keçirilib. Say baxımından isə XÖHKS sisteminin payı 98,2 faiz təşkil etmiş və hesabat dövrünün yekunu üzrə 11,992 mln. ədəd ödəniş olub. Bu da ötən ili həcm etibarilə 54,7 faiz (1 733 mln. manat) və say etibarilə 58,5 faiz (4 425 min ədəd) üstələyib. Hər bir ödənişin məbləği orta hesabla 411,3 manat təşkil edib.
Kommersiya bankları plastik kartlarının xidmət edilməsinə dair infrastrukturun inkişaf etdirilməsini davam etdiriblər. 2012-ci ilin I yarımilinin sonuna bank plastik kartlarına ölkə ərazisində yerləşdirilmiş 2 227 bankomatda və 36 310 pos-terminalda xidmət edilib. Qeyd edək ki, ötən ilin müvafiq dövrü ilə müqayisədə ölkə ərazisində pos-terminalların sayı 3,4 dəfə artıb.
2012-ci ilin I yarımilində bankomatlar vasitəsilə 3 565 mln. manat həcmində 23 403 mln. əməliyyat aparılıb. POS-terminallar vasitəsilə aparılan əməliyyatların sayı 1 988 min ədəd, həcmi isə 234 mln. manat təşkil edib.
Plastik kartların sayı il ərzində 245,5 min ədəd artaraq 4,8 mln. ədədə çatıb ki, bu da hər min nəfərə (yetkinlik yaşına çatmış) orta hesabla 804,3 ödəniş kartı deməkdir.
İnternet vasitəsilə bank xidmətlərindən istifadə də genişlənməkdədir. Belə ki, dövr ərzində internet-banking vasitəsilə 2.7 mln. manat məbləğində 13,3 min əməliyyat həyata keçirilib.