Azərbaycan, Bakı, 19 mart /Trend, müxbir A.Tağıyeva/
Türkiyənin "İş Bankası" Azərbaycan bankı "Rabitəbank"ın səhmlərinin alınması ilə bağlı danışıqlar aparır. Bu barədə Trend "Hürriyyət" qəzetinə istinadən məlumat verir.
Məlumata görə, bankın satılması təşəbbüsünü "Rabitəbank" irəli sürüb. Lakin Türkiyə bankı "Rabitəbank"la yanaşı, digər Azərbaycan bankları ilə də danışıqlar aparır. "Rabitəbank"la aparılan danışıqların uzun müddət davam etməsinə baxmayaraq, tərəflər qiymət barədə razılığa gələ bilmirlər.
Qəzetin məlumatına görə, Azərbaycan bankı bazar qiymətindən 2-2,5 dəfə çox məbləğ tələb edir.
"İş Bankası" daha əvvəl bir neçə dəfə Azərbaycanın bank bazarına daxil olmaqda maraqlı olduğunu bildirib. Belə ki, bank bazara daxil olmaq üçün yeni bankın yaradılması və ya ölkədə fəaliyyət göstərən hər hansı bankın səhmlərini almaq kimi müxtəlif variantları nəzərdən keçirib.