Azərbaycan, Bakı, 4 oktyabr /Trend, müxbir E.Əliyev/
Macarıstanın Azərbaycandakı səfirliyi vizaların verilməsi prosesini sürətləndirəcək.
Bu barədə cümə günü Trend-ə bu ölkənin Bakıdakı səfirliyinin konsulu və diplomatik missiya rəhbərinin müavini xanım Erika Tot bildirib:
"Biz səfirliyin qərargahının genişləndirilməsi, həmçinin ölkəmizə səfər etmək istəyənlərdən ərizələrin qəbulunun həyata keçirildiyi "Şengen pəncərələri"nin sayı haqqında müvafiq müraciət göndərmişik".
Onun sözlərinə görə, səfirlik azərbaycanlı turistlər tərəfindən Macarıstana qarşı belə maraq gözləmirdi.
E.Tot qeyd edib ki, hazırda yalnız bir "Şengen pəncərəsi" fəaliyyət göstərir və o, müraciət edənlərin böyük axını ilə bacarmır: "Nəticədə insanlar növbədə dayanmaq məcburiyyətində qalırlar, gecikmələr yaranır. Təəssüf ki, vizaların verilməsi prosesi vaxt tələb edən prosedurdur. Bu vaxt zəruri sənədlərin yoxlanılmasına və digər proseslərə sərf edilir. Ümid edirəm ki, artıq gələn il "Şengen pəncərələri"nin sayı artırılacaq, azərbaycanlı turistlər isə sənədləri daha tez verə və vizaları tez ala biləcəklər".
Onun sözlərinə görə, bu ilin yanvar-sentyabr aylarında səfirliyin verdiyi vizaların sayı 2602 ədəd təşkil edib ki, bu da 2012-ci iln göstəricisini 2,5 dəfə üstələyir: "Müqayisə üçün, ötən il diplomatik missiya Azərbaycan vətəndaşlarına 1036 viza vermişdi".