Azərbaycan, Bakı, 18 dekabr /Trend, müxbir A.Axundov/
Yanvar-noyabr aylarında Azərbaycanın nəqliyyat sektorunda 199,3 milyon ton müxtəlif növ yüklər daşınıb ki, bu da 2012-ci ilin yanvar-noyabr aylarındakından 3,3 faiz çoxdur. Trend-in məlumatına görə, bu barədə Azərbaycan Dövlət Statistika Komitəsinin hesabatında deyilir.
Daşınmış yüklərin ümumi həcmindən 75,2 faiz özəl sektorun payına düşür.
Bu ilin yanvar-noyabr aylarında yüklərin ümumi həcminin 57,5 faizi avtomobil nəqliyyatı ilə, 26,4 faizi boru kəmərləri, 10,7 faizi dəmiryol və 5,4 faizi isə dəniz nəqliyyatı ilə daşınıb.
Yanvar-noyabr aylarında 1,57 milyarddan artıq sərnişin daşınıb ki, bu da ötən ilin analoji dövr göstəricisindən 7,8 faiz çoxdur.
Sərnişinlərin əsas hissəsi (87,9 faiz) avtomobil nəqliyyatı və metro ilə (11,9 faiz) daşınıb.
Dəmiryol nəqliyyatı ilə 21,3 milyon ton müxtəlif yüklər daşınıb ki, bu da ötən ilin yanvar-noyabr aylarındakından 0,4 faiz çoxdur.
Dəniz nəqliyyatı ilə 10,7 milyon ton müxtəlif yüklər daşınıb. Daşınan yüklərin əsas həcmi beynəlxalq əməliyyatların payına düşür.
Azərbaycan limanlarında emal olunmuş yüklərin həcmi yanvar-noyabrda 11,5 milyon ton təşkil edib.
Bu dövrdə avtomobil nəqliyyatı ilə 114,6 milyon ton yük daşınıb. Bu, ötən ilin yanvar-noyabr aylarındakından 6 faiz çoxdur.
Avtomobil nəqliyyatı ilə sərnişindaşımanın həcmi 1,38 milyard nəfər (artım 8,1 faiz) təşkil edib. Sərnişinlərin 96,2 faizi avtobuslarla, 3,8 faizi minik avtomobilləri ilə daşınıb.
Metropolitenlə sərnişindaşımanın həcmi 187,3 milyon nəfər təşkil edib. Bu ötən ilin analoji dövründəkindən 5,8 faiz çoxdur.
Yanvar-noyabr aylarında hava nəqliyyatı ilə 1,55 milyon sərnişin daşınıb. Bu, ötən ilin analoji dövr göstəricisindən 4,2 faiz çox olub. Bu növdə daşımaların 0,5 faizi özəl sektorun payına düşüb.
