Azərbaycan, Bakı, 4 sentyabr /Trend, müxbir Zülfiyyə Qurbanova/
2014-cü ilin iyul ayında Azərbaycanın bank sektorunun kapitallaşması 2013-cü ilin analoji dövrünə nisbətən 23,6 faiz artaraq cari il avqustun 1-nə 3,705 milyard manat təşkil edib. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin ilk 7 ayının yekunlarına dair statistik hesabatında deyilir.
AMB-nin məlumatına görə, kapitalı 10 milyon manatdan çox olan (Mərkəzi Bankın qüvvədə olan normativ tələbləri) bankların sayı hesabat dövrünün yekunları üzrə 42 ədəd təşkil edib ki, bu da 2013-cü il iyulun sonuna olan göstərici ilə müqayisədə 1 ədəd çoxdur. Ölkənin bütün banklarının ümumi kapitalının həcmində bu kateqoriyadan olan bankların xüsusi çəkisi qeyd edilən dövrün yekunları üzrə 99,7 faiz təşkil edib.
Bir bankın kapitalı 5-10 milyon manat, bir bankın kapitalı isə 3,5-5 milyon manat səviyyəsində formalaşıb. Hesabat dövründə ölkənin bütün banklarının məcmu kapitalında bankların bu kateqoriyalar üzrə xüsusi çəkisi müvafiq olaraq 0,2 və 0,1 faiz təşkil edib. 2014-cü ilin sonuna AMB-nin bankların məcmu kapitalının minimum həcminə qarşı tələbi 50 milyon manat səviyyəsində müəyyənləşib.
2014-cü ilin ikinci rübünün yekunları üzrə Azərbaycanda 44 bank fəaliyyət göstərir: 43 kommersiya və bir dövlət bankı. Xarici kapitallı bankların sayı 22 ədəddir. Onlardan yeddisində xarici kapitalın xüsusi çəkisi 50 faizdən 100 faizədək, 13 bankda isə 50 faizədək təşkil edir. Həmçinin ölkədə xarici bankların daha iki filialı fəaliyyət göstərir.
