Dövlət mülkiyyətinin özəlləşdirilməsi prosesinin həyata keçirilməsində Azərbaycan hökuməti bir sıra problemlərlə qarşılaşır. İqtisadi inkişaf naziri Fərhad Əliyev Trend agentliyinə bildirib ki, dövlət heç də həmişə özəlləşdirmə prosesini uğurla həyata keçirə bilmir.
F.Əliyev qeyd edib ki, özəlləşdirmənin problemlərindən biri bu və ya digər müəssisənin rəhbəri tərəfindən həmin prosesin ləngidilməsidir.Onun sözlərinə görə, müəssisələ arasında elə hallara rəast gəlinir ki, bu və ya digər obyektin rəhbəri onu özü özəlləşdirmir və digər iddiaçılar üçün də azad özəlləşdirməsinə məhdudiyyət qoyur.
Nazir qeyd edib ki, bundan başqa, bir sıra müəssisələrin qiymətləndirilməsində qiymətin müəyyən edilməsinə onun real dəyəri yox, obyektin "adı" təzyiq göstərir. "Bəzi müəssisələrin adı vardır, mülkiyyəti aşağı səviyyədədir, amma qiymətləndirilməsində böyük qiymət deyilir.Neft bazalarının özəlləşdirilməsi misal ola bilər.Əgər bunların real dəyəri 50 mln. Manat təşkil edirsə, onda bu obyektin dəyərinin qiymətləndirilməsində 5 mlrd. Manat söyləniləcək, bu isə real dəyərin xeyli artırılması deməkdir " -deyə nazir bildirib.
Nazir özəlləşdirmənin daha bir problemi olaraq özəlləşdirilən obyektlərin borclarının həcmini bildirib. "Böyük həcmdə borcu olan müəssisələr var, xüsusilə özəl sektor qarşısında, əmək haqqı, pensiya hesablamalarına görə. Buna görə biz investisiya müsabiqələri keçiririk, təkrar elanlar aparırıq.Bunları satmaq istəyirik, amma alıcı yoxdur.Elə müəssisələr vardır ki, bunların borclarını dövlət qarşısında hesabdan pozmaq olar, amma elə müssisələr də vardır ki, bunların hesabını pozmaq mümkün deyil - bunlar əmək haqqı üzrə borclar, özəl sektor qarşısında borclar, ziyanın ödənməsinə görə olan borclardır" -deyə nazir qeyd edib.
Nazir özəlləşdirmənin daha bir probleminin tərəqqi ilə iş yerlərinin sayının qarşılıqlı əlaqəsi olduğunu bildirdi. "Əgər müəssisədə çoxlu işçi varsa, onları iş yerindən məhrum etmək də olmaz. Amma yeni texnologiyalar cəlb edildikdə 500 nəfərin yerinə 50 işçi işləyəcək " -deyə nazir qeyd edib.
F.Əliyevin sözlərinə görə, bu və ya digər problemlər ona gətirib çıxarır ki, artıq uzun müddətdir ki, sahibkarlar özəlləşdirmədə maraqlı deyillər. "Onlar yeni torpaqlar götürməyə, orada yeni müəssisələr təşkil etməyə və işləməyə hazırdırlar"-deyə nazir bildirib.
Onun sözlərinə görə, bu vəziyyətdən çıxış üçün problem mərhələli həll edilməlidir. "Əvvəllər problemlər çox idi, borclar silinmir.Amma mülkiyyətin qiyməti qalxır, buna maraq doğur.Problemin həlli də müəssisələrdə infrastrukturun yaxşılaşdırılması, enerji təchizatı, işçilərin sayının azaldılması və s. ilə təmin ediləcək. " -deyə F.Əliyev qeyd edib.
