Səudiyyə Ərəbistanının maliyyə naziri İbrahim ƏlAssaf Azərbaycanın baş nazirinin müavini Abid Şərifova məktub göndərib. Bu barədə Trend ə Səudiyyə Ərəbistanının Azərbaycandakı səfiri Əli Həsən Cəfər bildirib.
Onun sözlərinə görə, o, məktubu bu günlərdə Azərbaycanın baş nazirinin müavini Abid Şərifova verib. Səfirin sözlərinə görə, nazir öz məktubunda Gəncə-Yevlax avtomobil yolunun yenidən qurulması layihəsinin gerçəkləşdirilməsinə Fond tərəfindən $12 mln. ayrıldığını bildirir və layihənin həyata keçirilməsinə başlamağa hazırlığı qeyd edir.
Səfir qeyd edib ki, Səudiyyə Ərəbistanı rəhbərliyi Azərbaycan ilə hərtərəfli əməkdaşlığın inkişafında maraqlıdır. Onun sözlərinə görə, artıq bir neçə ildir ki, bu əməkdaşlıq siyasi, iqtisadi və mədəni sahələrdə uğurla inkişaf etdirilir.İndi isə Səudiyyə Ərəbistanı hökuməti ticarət, infrastrukturun, kommunikasiyanın inkişafı və digər sahələrdə münasibətləri daha da genişləndirməyi planlaşdırır.
