Fevralın 7 -də Bakıda Azərbaycanın IDI - INTOSAI İnkişaf Təşkilatının (Ali Auditor İnstitutlarının Beynəlxalq Təşkilatı) ekspert qrupu ilə əməkdaşlığının inkişaf perspektivləri müzakirə olunub. Müzakirələr IDI-nin baş direktoru Maqnus Borge ilə Azərbaycanın Hesablama Palatasının (HP) sədri Namiq Nəsrullayev arasında keçirilən görüş zamanı aparılıb.
HP-dan Trend ə verilən məlumata görə, görüşün gedişində strukturlar arasında əlaqələrin inkişafı məsələləri müzakirə edilib. M.Borge HP-nın əməkdaşları ilə görüşüb və onları başçılıq etdiyi strukturun fəaliyyəti ilə tanış edib və onları maraqlandıran suallara cavab verib.
M.Borgenin Bakıya səfəri fevralın 10-da başa çatır. Fevralın 7-də işə başlayan IDI-nin seminarı isə fevralın 24 -də öz işini başa vurur.
Seminar Maliyyə Nəzarəti Ali Orqanları (MNAO) əməkdaşlarının dövlət borcu auditi sahəsində ixtisasının artırılması məsələlərinə həsr olunub. Seminarın işində Azərbaycan da daxil olmaqla 8 ölkə (Bolqarıstan, Rusiya, Qazaxıstan, Hindistan, Belorus, Norveç və İsveçrə) iştirak edir.
