Almaniyanın KFW yenidənqurma bankı apreldə Azərbaycan hökuməti ilə AzDRES-İmişli elektrikötürücü xəttinin çəkilməsi layihəsi üzrə şərtləri son olaraq razılaşdırmağı planlaşdırır. Bu layihə üçün bank 30 mln avro ayırıb. Bankın Bakı ofisinin rəhbəri Natiq Abdullayevin Trend ə verdiyi məlumata görə, hökumətlə razılaşdırma başa çatdıqdan sonra il ərzində müvafiq müqavilələr bağlana bilər.
KFW tərəfindən maliyyələşdirilməsi təklif olunan layihədə AzDRES-dən İmişliyədək 195 km uzunluğunda elektrik ötürücü xətlərinin çəkilməsi, həmçinin, Goranboyda yarımstansiyanın inşası və 330 kVt gücündə İmişli yarımstansiyasında elektrik enerjisinin verilmə sahəsinin genişləndirilməsi nəzərdə tutulur. EÖX çəkildikdən sonra elektrik ötürücü xətlərinin gücü 200 mV-dən 700 mV-dək artacaq.
Alman bankı layihəni yarım kommersiya şərtləri ilə maliyyələşdirəcək, kredit 2 illik güzəşt dövrü ilə 12 il müddətinə ayrılacaq.
N.Abdullayevin sözlərinə görə, Almaniya Federal hökumətinin enerji təchizatı və elektrik enerjisinin səmərəli istifadəsi üzrə fondu tərəfindən qrantın ayırlması ilə əlaqədar enerji layihəsinin şərtləri yumşaldılıb. Nəticədə bank layihənin bir hissəsini qrant vəsaiti hesabına maliyyələşdirir. Əks halda kredit daha yüksək faiz dərəcəsi ilə 8-10 il müddətinə ayrılardı. Bu cür qrant vəsaitlərini Azərbaycan Almaniya hökumətindən ilk dəfə olaraq alacaq. Belə qərar isə onunla bağlıdır ki, hökumət Azərbaycanı Avropanın bir hissəsi hesab edir. Əgər inkişaf etməkdə olan ölkələr regionun inkişafı ilə bağlı tədbirləri həyata keçirirsə, o zaman Almaniya köməklik göstərməyə hazırdır.
İndiyədək Azərbaycan bankdan 10 il güzəşt dövrü və 0,75%-lə 40 il müddətinə güzəştli kredit alıb.