Azərbaycan və Cənubi Koreya sahibkarlarının biznes-forumunun mayın 11-də Bakıda keçirilməsi planlaşdırılıb. Trend in Azərbaycanın İxracın Təşviqi və İnvestisiyalar Fondunun (AZPROMO) press-relizinə istinadən yaydığı məlumata görə, biznes-forum Cənubi Koreyanın prezidenti Ro Mu Nyuyunun Azərbaycana səfərinə həsr olunub. Tədbir İqtisadi İnkişaf Nazirliyinin dəstəyi ilə AZPROMO tərəfindən təşkil olunacaq.
Forumun işində 30-dan artıq Koreya, 60-ya yaxın Azərbaycan şirkətinin təmsil olunacağı gözlənilir. Forumda Cənubi Koreya maşınqayırma, ticarət, energetika, aviadaşınmalar və digər sahələr və eləcə də biznes birlikləri ilə təmsil olunacaq. Bakıya LG Electronics Inc, Daewoo international corporation, Hyundai kimi milli tranmilli şirkətlərin nümayəndələri gələcək. Azərbaycan biznes cəmiyyətini əsas etibarilə sənaye sahələri təmsil edəcəklər.
Forum çərçivəsində AZPROMO və Koreya Ticarət və Sənaye Palatası arasında qarşılıqlı anlaşma haqqında memorandum imzalanacaq.
