2006-cı ildə Azərbaycan sığorta şirkətləri ümumi məbləği 20 mln. manatdan çox olan (təxminən 25 mln. ABŞ dolları) iki böyük sığorta kompensasiyası ödəyib. Maliyyə Nazirliyinin Dövlət sığorta nəzarəti şöbəsinin başçısı Namiq Xəlilovun Trend ə verdiyi xəbərə görə, kompensasiya yalnız iki sığorta hadisəsi üzrə Atəşgah və Azal Sığorta tərəfindən ödənilib.
Atəşgah enerji riskləri üzrə 12 mln. manat, Azal Sığorta isə - AN-140-100 təyyarəsinin qəzaya uğraması ilə əlaqədar aviasiya riskləri üzrə 8 mln. manatdan artıq ödəyib.
N.Xəlilovun sözlərinə görə, Azərbaycanın sığorta şirkətlərinin kapitallaşdırılmasının artırılması məsələsi riskləri ölkədə daha çox saxlamağa, xaricdə daha az yenidən sığortalanmağa imkan verəcək.
"Lakin biz yenidən sığortaya daha az vəsait yönəltməyi özümüzə məqsəd qoya bilmərik, əks təqdirdə bizdə yaxşı mühafizə olmayacaq. Yeni qanunvericilikdə şirkətlərin riskləri Azərbaycanda və ya xarici şirkətlərdə daha yüksək reytinqlə yenidən sığortalamaq üçün iqtisadi cəhətdən stumullaşdırılması nəzərdə tutulub. Bu gün biz məqsədimizi etibarlığın təmin olunmasında görürük, çünki yenidən sığortalanma ucuz xidmət deyil, lakin çox gərəklidir", - deyə N.Xəlilov qeyd edib.